Qazaqstanda ajyrasqan ákelerdiń 30 paıyzy balalarymen tildese almaıdy
ASTANA. QazAqparat - Qazaqstanda ajyrasqan ákelerdiń 30% balalarymen kezdese almaı, sotqa qaıta júginýge májbúr, dep habarlaıdy QazAqparat tilshisi.
Bul týraly Astanada ótken «Bala aýmaǵy - baqyt aýmaǵy» otyrysynda aıtyldy.
«Sot sheshimine qaramastan, ákelerdiń 30% balalarmen qarym-qatynas jasaý múmkindiginen aıyrylǵan. Olar sotqa qaıta júginýge májbúr. Bul máselede ıývenaldyq sottar kámeletke tolmaǵan balalardyń quqyǵy men bostandyǵyn qorǵaýdy eskere otyryp, psıhologtardyń qatysýymen sheshim qabyldaıdy», - dedi «Qazaqstan áıelderi qaýymdastyǵy» qoǵamdyq birlestiginiń prezıdenti Gúlnar Baıymbetova.
«Keleshek» psıhologııalyq ortalyǵynyń dırektory Natalıa Semenenko psıhologtarǵa arnalǵan arnaıy ereje qajettigin jetkizdi.
«Kámelet jasyna tolmaǵandardyń isi boıynsha birneshe jyl sýdıa bolyp jumys istedim. Bir túsingenim, Qazaqstanda psıhologtardyń normatıvti qujaty joq. Sondyqtan, ajyrasý men balalardy bólisýde psıholog kómegi tıimsiz bolyp otyr. Sebebi, ár psıholog óz tájirıbesi men óz paıymyna qaraı jumys isteıdi. Qos tarapqa birdeı qaramaı, konsýltatsııaǵa jazylǵan tarapty qoldap ketýi de yqtımal», - dedi «Keleshek» psıhologııalyq ortalyǵynyń dırektory Natalıa Semenenko.
Onyń aıtýynsha, isti qaraý protsedýrasyn retteıtin normatıvti qujat bolýy tıis. Qujatta balanyń psıhologpen kezdesý sanyn, psıhologııalyq testileýden ótýin anyqtaıtyn normalar bolýy qajet.
«Psıhologııalyq testileýdi jattap alǵan balalardy da kórdik. ıAǵnı ata-ana ajyrasyp, odan keıingi máselelerdi sheshýge tyrysyp jatyr. Al balalar erli-zaıyptylardyń kúsh pen bılikti ıemdenýine kómektesetin quralǵa aınaldy. Balalardyń mindeti - damý jáne oqý. Birge tursa da, bólek tursa da, balalar tek baqytty ata-anany kórýi kerek. Balalar qorǵaýǵa muqtaj, al psıhologtarǵa qural jetispeıdi. Biz barlyq óńirde biryńǵaı erejeniń jumys istegenin qalaımyz», - dedi N. Semenenko.
Otyrysta «Qazaqstan áıelderi qaýymdastyǵy» qoǵamdyq birlestigi ajyrasý kezinde balalar men ata-analarǵa áleýmettik-psıhologııalyq, psıhologııalyq-pedagogıkalyq zertteýler ótkizý jónindegi erejeni usyndy. Qujat kámeletke tolmaǵan balalardyń turatyn jerin aıqyndaý men kezdesý tártibin taǵaıyndaýǵa septigin tıgizbek.
Aıta keteıik, Qazaqstanda erli-zaıyptylardyń ajyrasýy kóbeıdi. Resmı derekter boıynsha, Qazaqstanda árbir ekinshi neke ajyrasýmen aıaqtalady, onyń 83%-ynyń ortaq balalary bar. 400 000 ana balalaryn jalǵyz tárbıelep otyrsa, 60 000 jalǵyzbasty áke bar.
