Qazaqstanda ajyrasýdyń basty sebebi – turmystyq zorlyq-zombylyq
ASTANA. KAZINFORM – Qazaqstanda erli-zaıyptylardyń ajyrasýyna turmystyq zorlyq-zombylyq, opasyzdyq jáne táýeldilikter negizgi sebep bolyp otyr. Bul týraly áleýmettanýshy Juldyz Kúmisbek Jibek Joly telearnasynyń «Búgin LIVE» baǵdarlamasynda málimdedi.
– Ajyrasýdyń basty sebepteriniń qatarynda eń joǵarǵy úles turmystyq zorlyq-zombylyqqa tıesili – bul 60 paıyzdan asady. Ol erli-zaıyptylar arasyndaǵy nemese balaǵa qatysty fızıkalyq qysym túrinde bolýy múmkin. Ekinshi orynda – opasyzdyq. Úshinshi sebep – lýdomanııa, nashaqorlyq, ishimdikke salyný. Áleýmettik zertteýler bul faktorlardy negizgi sebepter retinde kórsetip otyr, - dedi sarapshy.
Resmı statıstıkaǵa sáıkes, ajyrasqandardyń 35 paıyzy 1– 4 jyl, 25 paıyzy 5–9 jyl, al 8 paıyzy nebári bir jyl ishinde nekesin buzǵan. Sarapshynyń aıtýynsha, nekeni tirkeý protsesiniń jeńildigi de ajyrasý sanyna áser etýi múmkin.
– Bizdiń elde úılený rásimi óte jeńil ótedi. 2024 jyly úılený kórsetkishi ótken jylmen salystyrǵanda 2,2 paıyzǵa artqan. Qarapaıym Kaspi usynysy arqyly da úılenýge sheshim qabyldap jatqandar bar. Al ajyrasý – kúrdeli másele retinde qarastyrylǵanymen, otbasylyq qundylyqtar tolyq saqtalmaıdy nemese ózgeriske ushyraýda, - dedi Juldyz Kúmisbek.
Buǵan deıin, bıyl 16 qyrkúıekten bastap elimizde neke buzý tártibi ózgeretinin jazǵanbyz.