Qazaqstanda ájethana qaǵazyn óndirý 27%-ǵa artty
NUR-SULTAN. QazAqparat – Elimizde 2020 jyldyń qańtar-shilde aılarynda qaǵaz jáne qaǵaz ónimderin óndirý kólemi ótken jyldyń osy kezeńimen salystyrǵanda úsh esege artyp, 48,3 mlrd teńgege jetti, dep habarlaıdy QazAqparat Energyprom.kz portalyna silteme jasap.
Byltyrǵa arnalǵan ónerkásip óndirisiniń ındeksi 115,7%-dy qurady (bir jyl buryn – 99,1% bolǵan).
Salystyrý úshin aıta ketsek, 2019 jyly qaǵaz óndirisi 66,8 mlrd teńgege jetip, jyldyq ósim 14,6%-dy quraǵan.
Qazaqstannyń óńirleri arasynda qaǵaz jáne qaǵaz ónimderin shyǵarý boıynsha qańtar-shilde aılary boıynsha Almaty oblysy kósh bastap tur: 12,2 mlrd teńge, jyldyq ósim – 11,4%. Odan keıingi orynda Almaty qalasy tur: 11,4 mlrd teńge, jyldyq ósim – 18,6%. Úzdik úshtikti Aqmola oblysy túıindegen. Bul óńirde qaǵaz óndirisi 32 esege artyp, 9,5 mlrd teńgege jetken.
Jekelep alsaq, ótken jyldyń qańtar-shilde aıymen salystyrǵanda ásirese ájethana qaǵazy óndirisi 26,5%-ǵa, 23,3 myń tonnaǵa artty.
Sonymen qatar gofrlengen qaǵazdan nemese kartonnan jasalǵan qoraptar, jáshik pen sómkeler óndirisi 20,2%-ǵa, 61,7 myń tonnaǵa ulǵaıǵan.
Sondaı-aq oralǵan nemese paraq túrindegi gofrlengen perforatsııalanǵan qaǵaz ben karton (17,9 myń tonnaǵa deıin) jáne qol oramaldar men kosmetıkalyq salfetkalar (2,1 myń tonnaǵa deıin) óndirisi 26,5% - ǵa qysqardy.
