Qazaqstanda ázerbaıjandyq «CBC TV» telearnasy habar tarata bastaýy múmkin
ASTANA. KAZINFORM — Elimizde Ázerbaıjannyń «CBC TV» telearnasyn tirkeý múmkindigi qarastyryp jatyr. Bul týraly búgin elordada ótip jatqan Ortalyq Azııa medıaforýmynda belgili boldy.
Forým aıasynda Mádenıet jáne aqparat mınıstri Aıda Balaeva Ázerbaıjan Respýblıkasynyń Medıa damytý agenttiginiń atqarýshy dırektory Ahmed Ismaılovpen kezdesý ótkizdi.
Kelissóz barysynda taraptar halyqtar arasyndaǵy jaqyndasý men ortaq aqparattyq keńistik qalyptastyrýda mádenıet, bilim berý men medıanyń mańyzdy rólin atady. Ásirese, teń dárejeli aqparat taratý máselesine erekshe nazar aýdaryldy. Qazir Mádenıet jáne aqparat mınıstrligi Ázerbaıjannyń «CBC TV» telearnasyn elimizdiń aýmaǵynda tirkeý múmkindigin qarastyryp jatyr.
Odan bólek Aıda Balaeva CNN-niń Ortalyq Azııa jáne Afrıka boıynsha ókili Saıed Imran Ahmadpen kezdesti. Taraptar telejýrnalıstıka men medıa salasyn damytýǵa baǵyttalǵan ekijaqty yntymaqtastyqty keńeıtý josparlary men perspektıvalaryn talqylady.
Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr.
Buǵan deıin Mádenıet jáne aqparat mınıstri Ortalyq Azııa jýrnalıster akademııasy men kreatıvti hab qurýdy usyndy. Sonymen qatar Ortalyq Azııa elderiniń BAQ ókilderine arnalǵan ortaq syılyq taǵaıyndaý bastamasyn alǵa tartty.