Qazaqstanda Ázerbaıjan dramatýrgynyń pesasy boıynsha túsirilgen fılm kórermenge jol tartty
ASTANA. KAZINFORM — Qazaqstanda rejısser Jandos Aıbasov túsirgen «№ 37» fılmi kórermenge usynyldy. Fılmniń negizinde Ázerbaıjan dramatýrgy Ismaıl Imanyń pesasy jatyr, dep habarlaıdy AZERTADJ.
Oqıǵa Rasýldyń tarıhyna qurylǵan: ol terrorlyq aktiniń saldarynan qaza tapqan, biraq on bes jyldan keıin kútpegen jerden otbasyna oralady.
AZERTADJ habarlaýynsha, fılmniń premerasy bolǵan kúni Almatyda 2022 jyly táýelsiz ŞAM teatry sahnalaǵan birdeı ataýmen spektakldiń júzinshi jáne sońǵy kórsetilimi ótti. Bul spektakl Ismaıl Imanyń «Sady Astary» (2017) pesasy negizinde qoıylǵan.
Spektakl Qazaqstannyń eń tanymal qazirgi zamanǵy rejısserleriniń biri Farhad Moldaǵalıdiń jetekshiliginde sahnalanǵan. «Sady Astary» pesasyn qazaq tiline dramatýrg Álisher Rahat aýdardy. Onyń aýdarmalarynyń jınaǵy, sonyń ishinde «Sady Astary» pesasy da osy kúnderi jaryq kórdi.
Ismaıl Iman óz mátininiń ózge elde tanylyp, aldymen teatr sahnasynda, keıin kıno arqyly kórermenge jetkenine qatty qýanatynyn jetkizdi. Ol muny «balam sııaqty» dep sıpattaıdy: ıaǵnı pesa óz aldyna jeke ómir súrip, basqa tilde sóılep, jańa aýdıtorııaǵa tanylyp jatyr.
— Pesa Qazaqstanǵa beıimdelgen — mysaly, Astary baqtarynyń ornyna Balqash kóli alynǵan. Biraq jalpy ıdeıasy ózgermegen: negizgi mán — adam taǵdyry, adamdar arasyndaǵy qarym-qatynas pen onyń náziktigi. Qyzyǵy, fılm spektakldiń tanymaldylyǵy men myqty akterlerdiń arqasynda bastapqy pesadaǵy oqıǵalarǵa odan da jaqynyraq bolyp shyqqan, — dedi Iman.
Aıta ketetini — spektaklde oınaǵan akterlerdiń basym bóligi fılmge de túsken. Qazaqstanda alǵash ret teatr qoıylymy kınoǵa osylaı beıimdelip otyr.
Fılmniń basty rólderinde Erkebulan Daıyrov, Asan Majıt, Zarına Karmen jáne basqa da akterler oınaǵan. Ismaıl Iman arnaıy shaqyrylyp, spektakldiń sońǵy kórsetilimine jáne fılmniń tanystyrylymyna qatysty.
Aıta keteıik, jańa kıno aptalyǵynyń bastalýymen kórermenderdi qyzyqty premeralar jınaǵy kútip tur. Aldaǵy kúnderi qandaı fılmder kórýge turarlyq ekenin bilý úshin Kazinform tilshisiniń materıalyn oqı alasyz.