Qazaqstanda azaptaýdyń barlyq jaǵdaıyna qatysty máselelerdi arnaıy prokýrorlar tekseretin bolady - Bas prokýror orynbasary
ASTANA. 18 mamyr. QazAqparat /Qanat Mámetqazyuly/ - Qazaqstanda azaptaýdyń barlyq jaǵdaıyna qatysty máselelerdi arnaıy prokýrorlar tekseretin bolady.
Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jáne qylmystyq is júrgizý zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda QR Bas prokýrorynyń orynbasary Iogann Merkel málim etti.
«Jaqynda Qazaqstanǵa BUU-nyń arnaýly baıandamashysy Manfred Novak saparmen kelip ketti. Ol azaptaýlar jáne basqa da qaıyrymsyz, adamshylyqqa jat nemese adamgershilik ar-namysyn qorlaıtyn qylmys túrleri men jazalar boıynsha arnaýly baıandamashy bolyp tabylady. Osyǵan oraı, biz tıisti memlekettik organdardyń barlyǵymen sáıkes jumystardy júrgizdik. Budan bólek, QR Qylmystyq kodeksine 18 qańtarda ózgeris engizilip, ol boıynsha 141 bap BUU Azaptaýlarǵa qarsy konveentsııasynyń 1 babyna sáıkes keltirildi», - dedi I. Merkel.
Onyń aıtýynsha, BUU arnaıy baıandamashysynyń saparynan keıin bas prokýratýra aldyna júktelgen mindetterdi júzege asyrý boıynsha arnaıy nusqaýlar jasalyp, Bas prokýrordyń úsh buıryǵy shyqqan.
