Qazaqstanda azamattyq qoǵam úshin Ádep kodeksi ázirlenedi
ASTANA. QazAqparat - Qazaqstanda azamattyq qoǵam úshin Ádep kodeksi ázirlenedi. Bul týraly búgin Ortalyq kommýnıkatsııalar qyzmetindegi brıfıngte «Qazaqstannyń Azamattyq alıansy» zańdy tulǵalar birlestiginiń prezıdenti Nurlan Erimbetov aıtty, dep habarlaıdy QazAqparat.
«Qazirgi ýaqytta bizde úkimettik emes uıymdardyń Ádep kodeksiniń jobasy ázirlenýde. Eger biz ony erteń qabyldaıtyn bolsaq, onda bul barlyq ÚEU-lerdiń jumysy úshin qandaı da bir mindetti shart bolar edi. Ózińdi qalaı ustaý kerek? Adamdarmen qalaı sóılesý qajet? Basshymen qalaı sóılesken jón? Munyń barlyǵynyń da bizdiń salamyzdy buzbaıtyndaı ádebi bolýy tıis. Biz búgingi kúni kópshiligine ózin naqty ári durys ustaýdy úıretkimiz keledi», - dedi Erimbetov.
Esterińizge sala keteıik, 25 qarasha kúni elordada Qazaqstannyń VII Azamattyq forýmy ótedi. Atalǵan alqaly jıynda atalǵan kodeksti qabyldaý josparlanǵan. Sharaǵa QR Prezıdenti Ákimshiliginiń basshylyǵy, QR Parlamenti depýtattary, ortalyq jáne jergilikti atqarýshy organdardyń, óńirlik jáne respýblıkalyq ÚEU ókilderi. Sheteldik sarapshylar men dıplomatııalyq mıssııalardyń basshylary, sarapshylyq qoǵam men BAQ ókilderi qatysatyn bolady.
Aıta keterligi, forým qarsańynda elimizdiń barlyq oblys ortalyqtary men Astana jáne Almaty qalalarynda óńirlik forýmdaı uıymdastyrylady. Onda VII Azamattyq forýmǵa qatysatyn delegattar iriktelip, respýblıkalyq aýqymdaǵy alqaly jıynda aıtylatyn usynystar saralanady.
