Qazaqstanda azamattyq avıatsııaǵa qatysty jańa Konventsııa qabyldanady
ASTANA. QazAqparat - Qazaqstanda «Azamattyq avıatsııaǵa qatysty zańsyz aktilermen kúres týraly» Halyqaralyq Konventsııa ratıfıkatsııalanady, dep habarlaıdy QazAqparat tilshisi.
Bul týraly Zań jobasyn búgin QR Investıtsııalar jáne damý vıtse-mınıstri Qaıyrbek Óskenbaev Parlament Senatynyń Halyqaralyq qatynastar, qorǵanys jáne qaýipsizdik komıtetiniń otyrysynda tanystyrdy.
«Jobanyń maqsaty - azamattyq avıatsııa salasynda zańsyz áreketter jasaǵan tulǵalarǵa qylmystyq jaýapkershilik taǵaıyndaý. Atap aıtqanda, áýejaıda jáne ushyp kele jatqan áýe kemesiniń bortyndaǵy adamǵa qatysty zorlyq-zombylyq aktisin jasaý; isten shyǵatyn qurylǵyny nemese zatty áýe kemesiniń bortyna ornalastyrý; áýe kemesin paıdalana otyryp, jarylǵysh zattardy, hımııalyq, bıologııalyq, ýlandyratyn radıoaktıvti materıaldardy tasymaldaý jáne tastaý; ushý kezinde áýe kemesin joıý, áýejaıdaǵy jabdyqtardy buzý jáne zaqymdaý; jalǵan málimetter habarlap, áýe kemesiniń qaýipsizdigine qater tóndirý; aeronavıgatsııalyq quraldy zaqymdap, áýe kemesin qarý retinde qoldaný - osynyń barlyǵy zańsyz áreketter bolyp sanalady. Qazaqstannyń Qylmystyq Kodeksinde atalǵan aktiler úshin qylmystyq jaýapkershilik kózdelgen», - dep túsindirdi vıtse-mınıstr.
Onyń aıtýynsha, bul erejelerdi qabyldaý BUU Qaýipsizdik Keńesiniń terrorızmge qarsy kúres talaptaryn qanaǵattandyrýǵa, azamattyq avıatsııanyń ushý qaýipsizdigine tónetin qaýip-qaterlerge tıisti deńgeıde jaýap berýge kómektesedi.
«Qazaqstan Respýblıkasy Álemdik qoǵamdastyqtyń áýe kóligindegi terrorızmniń barlyq formasymen jáne kórinisimen kúres jónindegi ujymdyq sharalaryn turaqty túrde qoldaıdy. Konventsııany ratıfıkatsııalaý QR tarapynan qosymsha shyǵyndar men mindettemelerdi qajet etpeıdi. Konventsııa ratıfıkatsııalanǵan jaǵdaıda qandaı da bir negatıvtik-quqyqtyq jáne áleýmettik saldar bolmaıdy. Zań jobasyn qoldaýlaryńyzdy suraımyz», - dep sózin túıindedi Q. Óskenbaev.
Depýtattar daýys berý arqyly Zań jobasyn qoldap, Senat otyrysynyń qaraýyna shyǵarý jóninde sheshim qabyldady.
