Qazaqstanda azamattyq avıatsııa salasynda bilikti kadrlar jetispeıdi

NUR-SULTAN. QazAqparat – Qazaqstanda azamattyq avıatsııa salasynda bilikti kadrlar jetispeıdi. «Samuryq-Qazyna» AQ-nyń Logıstıka jáne halyqaralyq yntymaqtastyq jónindegi basqarýshy dırektory Qanat Alpysbaevtyń aıtýynsha, bul máselege úkimettik deńgeıde mán bergen abzal, dep habarlaıdy QazAqparat tilshisi.

Q.Alpysbaev bilikti kadrlardy daıarlaý jumysyndaǵy máselelerdi atap ótti.

«Mınıstr (Indýstrııa jáne ınfraqurylymdyq damý mınıstri Beıbit Atamqulov – red.) óz baıandamasynda birqatar baǵytty atap ótken bolatyn. Alaıda, «Airbus» áýe kompanııasynyń málimetine súıensek, 2038 jylǵa qaraı búkil álem boıynsha jańa pılottarǵa degen suranys qosymsha 550 myń adamǵa deıin ósedi. Al ınjenerlik-tehnıkalyq quramǵa degen suranys 640 myń adamǵa ulǵaıady. Qazirgi ýaqytta «Samuryq-Qazynaǵa» enetin otandyq áýe kompanııalar («Air Astana», «Qazaq air» jáne «FlýArystan») kadrdyń jetispeýshiligin aıqyn sezip otyr. «Air Astana» men «Qazaq air» óz resýrsyn paıdalaný arqyly jumysty jalǵastyryp jatqanymen, bizdiń oıymyzsha, bul qadam máseleni túpkilikti sheshpeıdi», - dedi ol búgin Úkimet otyrysynda.

Qanat Alpysbaevtyń aıtýyna qaraǵanda, Úkimet deńgeıinde pılottardy oqytý, daıarlaý máselesine mán bergen abzal.

Eske sala ketsek, QR Indýstrııa jáne ınfraqurylymdyq damý mınıstri Beıbit Atamqulov búgingi Úkimet otyrysynda Qazaqstanda Azamattyq avıatsııa oqý ortalyǵy qurylatynyn málim etken edi.

«Bizdiń elimizde jalǵyz oqý orny – Azamattyq avıatsııa akademııasy bar. Onyń qabyrǵasynda jyl saıyn 400-den astam maman daıarlanyp shyǵady. Olar ushý praktıkasyn shetelden ótedi. Mınıstrlik joǵary bilikti kadrlardy daıarlaý maqsatynda Azamattyq avıatsııa akademııasyn damytý josparyn ázirleýde. 2020 jyly biz sala boıynsha barlyq qoldanystaǵy oqý oryndaryn shoǵyrlandyryp, eýropalyq standarttarǵa saı keletin Azamattyq avıatsııa oqý ortalyǵyn qurýdy josparlap otyrmyz», - dedi mınıstr.