Qazaqstanda azamattyǵy joq 7 myń adam tirkelgen
«COVID-19» indeti azamattyǵy joq adamdardyń jaǵdaıyn odan ári qıyndata tústi. Sebebi jeke basyn kýálandyratyn qujat bolmaǵan soń, ol azamatqa medıtsınalyq nemese áleýmettik kómek kórsetilmeıdi», - dedi Azamattyǵy joq máseleler jónindegi óńirlik keńesshi, BUU Bosqyndar isteri jónindegi joǵary komıssar basqarmasynyń Ortalyq Azııa boıynsha ókili Roman Marın Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, Qazaqstan aýmaǵynda ótken jyldyń qazan aıynan bastap azamattyǵy jáne jeke kýáligi joq azamattardy anyqtaýǵa arnalǵan birlesken aktsııa ótti.
«Biz Qazaqstan Respýblıkasynda ár adamnyń jeke quqyǵy qorǵalyp, onyń azamattyǵyn zańdastyrýda barlyq múmkindik qarastyrylǵanyna senimdimiz. Ótken jyldyń sońynda Qazaqstan aýmaǵynda azamattyǵy joq 7 myń adam tirkeldi. Aıtyp ótken jón, «azamattyǵy joq» mártebesin resmı túrde alǵan adam, zań aıasynda óz quqyǵyn qorǵap, azamattyǵy bar adamdarmen birdeı múmkindikterdi qoldana alady. Qazaqstanda bul baǵyttaǵy jumystardy ІІM quzyrly jáne úkimettik emes uıymdarmen birlesip atqaryp jatqan eńbegi óz jemisin berip jatyr. Biz de óz tarapymyzdan azamattyǵy joq adamdarǵa jan-jaqty qoldaý kórsetýge ázirmiz», - deıdi ol.
Aıta ketsek, osyǵan deıin QR ІІM Kóshi-qon komıtetiniń ókili elimizde jeke kýáligi joq 4,6 myńnan astam azamat anyqtalǵanyn aıtty.
