Qazaqstanda azamattardyń jeke qaýipsizdigin qorǵaýǵa baǵyttalǵan jańa zań kúshine endi

ASTANA. KAZINFORM – 2025 jylǵy 16 shildede Memleket basshysy qylmystyq zańnamany ońtaılandyrý máseleleri jónindegi Zańǵa qol qoıdy, dep habarlady Bas prokýratýranyń baspasóz qyzmeti.

Qujat azamattardyń qaýipsizdigin qamtamasyz etý jáne jeke ómirge qol suǵatyn, biraq kúsh qoldanýsyz jasalatyn quqyqqa qarsy áreketterdiń aýyr qylmysqa ulasýyna jol bermeý maqsatynda qabyldandy. Osy baǵytta Qylmystyq kodekske stalkıng úshin qylmystyq jaýaptylyq engizildi (QK-tiń jańa 115-1-baby).

- Stalkıng – zorlyq-zombylyqpen baılanysty emes adamnyń zańsyz qýdalanýy retinde aıqyndalǵan. Mundaı áreketterde kúsh qoldaný belgileri bolmaǵandyqtan, ol qylmystyq teris qylyqtar sanatyna jatqyzyldy.

Bul baptyń maqsaty – fızıkalyq kúsh qoldanýǵa nemese ashyq qaýip-qaterge barmaǵan, biraq qýdalaý áreketterimen zııan keltiretin adamdardan yqtımaly joǵary qurbandardy qorǵaý.

Jańa normalar 2025 jylǵy 16 qyrkúıekten bastap qoldanysqa engizildi. Osy ýaqyttan beri stalkıng faktileri boıynsha eki qylmystyq is tirkeldi – Atyraý jáne Pavlodar oblystarynda, - delingen aqparatta.

Zańǵa sáıkes stalkıng jasaǵandarǵa 200 aılyq eseptik kórsetkishke deıin (AEK) aıyppul salý nemese dál sol mólsherde túzeý jumystaryna tartý, ne 200 saǵatqa deıingi merzimge qoǵamdyq jumystar atqarý, ne 50 táýlikke deıin qamaýǵa alý túrindegi jaza kózdelgen.

Sondaı-aq áıelderdiń quqyqtaryn qorǵaýdy kúsheıtý maqsatynda jańa zańmen neke qııýǵa májbúrleý úshin de qylmystyq jaýaptylyq engizildi (QK-tiń jańa 125-1-baby).

- Eger áıel adam urlanyp, kúsh qoldaný qaýpimen nemese múlkin joıý ne búldirý qaterimen neke qııýǵa májbúrlense, kináli adamǵa 2000 AEK-ke deıin aıyppul salý, ne dál sol mólsherde túzeý jumystaryna tartý, ne 2 jylǵa deıingi merzimge bas bostandyǵyn shekteý nemese aıyrý túrindegi jaza qoldanylady.

Abaısyzda aýyr zardaptarǵa ákelgen jaǵdaıda kináli tulǵa 5 jyldan 10 jylǵa deıin bas bostandyǵynan aıyrý jazasyna tartylady.

Neke qııýǵa májbúrleý faktileri boıynsha alǵashqy qylmystyq ister Shymkent qalasynda, sondaı-aq Qyzylorda, Aqtóbe jáne Mańǵystaý oblystarynda tirkelgen. Eki jaǵdaıda jábirlenýshiler kámeletke tolmaǵandar bolǵan, - dep jazdy prokýratýradan.

Atalǵan ister boıynsha tergeý jalǵasýda jáne prokýratýra organdarynyń baqylaýynda tur.