Qazaqstanda azamattardy turǵylyqty jeri boıynsha tirkeý tártibi ózgerip jatyr

ASTANA. KAZINFORM — 2025 jylǵy 24 qarashadan bastap azamattardy turǵylyqty jeri boıynsha tirkeý rásimine engizilgen ózgerister kúshine enedi, dep habarlaıdy «Ulttyq aqparattyq tehnologııalar» AQ baspasóz qyzmeti.

Qyzmet tek onlaın formatta — eGov.kz elektrondyq úkimet portaly nemese eGov Mobile mobıldi qosymshasy arqyly kórsetiledi.

Turǵylyqty jeri boıynsha onlaın-tirkeýden ótý úshin paıdalanýshyǵa elektrondyq tsıfrlyq qoltańba (ETsQ) jáne onyń jeke kabınetine tirkelgen telefon nómiri (MAB) qajet. Protsedýra tolyq avtomattandyrylǵan jáne onlaın túrde júzege asyrylady, bul qyzmet alý ýaqytyn aıtarlyqtaı qysqartady. Sondaı-aq azamattar bul qyzmetti Halyqqa qyzmet kórsetý ortalyqtarynyń ózine-ózi qyzmet kórsetý aımaqtarynda onlaın rásimdeı alady.

Qyzmet kelesi sanattaǵy azamattarǵa kórsetiledi:

• Qazaqstan Respýblıkasynyń azamattaryna, onyń ishinde turǵyn úı ıelerine;
• sot sheshimimen áreketke qabiletsiz nemese áreket qabileti shekteýli bolyp tanylǵan 18 jastan asqan azamattardyń qorǵanshylary men zańdy ókilderine;
• 14-16 jas aralyǵyndaǵy balalardyń ata-analaryna nemese zańdy ókilderine.

14 jasqa deıingi balalar jeke tirkeýge turmaıdy. Qazaqstan Respýblıkasynyń Azamattyq kodeksiniń 16-babyna sáıkes, on tórt jasqa tolmaǵan balanyń turǵylyqty jeri onyń ata-anasynyń nemese zańdy ókilderiniń turǵylyqty jeri sanalady.

14 pen 16 jas aralyǵyndaǵy balalardy ata-analary nemese zańdy ókilderi tirkeıdi. Sot sheshimimen áreketke qabiletsiz dep tanylǵan 18 jastan asqan azamattardy da olardyń qorǵanshylary eGov.kz portaly arqyly jańa mekenjaıǵa tirkeı alady.

Memlekettik jaldamaly turǵyn úıde turatyn azamattarǵa qatysty da jańartýlar engizildi.

— Endi mundaı úıdiń jalǵa alýshysy shartta kórsetilgen tulǵalardy turǵylyqty jeri boıynsha tirkeı alady. Eger ótinish berýshi jaldaý shartyndaǵy tizimde bolmasa, júıe ótinishti avtomatty túrde qaıtarady. Memlekettik jaldamaly turǵyn úıge tirkeý boıynsha suraqtar týyndaǵan jaǵdaıda, turǵyn úı ornalasqan jerdegi jergilikti atqarýshy organǵa júgingen jón. Eger ótinish berýshi ózine tıesili emes mekenjaıǵa tirkelýge ótinish berse, júıe úı ıesine 1414 nómirinen SMS-kod jiberedi. Turǵyn úıdiń ıesi habarlama alynǵan sátten bastap bir saǵat ishinde kelisimin rastaýy qajet, — delingen mekeme taratqan habarlamada.

eGov.kz portaly arqyly qyzmetti qalaı alýǵa bolady:

1. Portalda avtorızatsııadan ótińiz jáne myna bólimge kirińiz:
2. Azamattarǵa → Azamattyq, mıgratsııa jáne ımmıgratsııa → Turǵylyqty jeri boıynsha tirkeý.
3. «Onlaın suraý» batyrmasyn basyńyz.
4. Elektrondyq ótinimdi toltyryp, ETsQ nemese bir rettik SMS-kod arqyly qol qoıyńyz.
5. Qyzmet nátıjesin jeke kabınetten kórýge bolady. Ótinimniń óńdelý mártebesi «Qyzmetterdi alý tarıhy» bóliminde kórsetiledi.

eGov Mobile arqyly tirkeýden ótý tártibi:

1. eGov Mobile qosymshasyna kirip, «Memlekettik qyzmetter» bólimine ótińiz.
2. «Jyljymaıtyn múlik jáne TKSh» bóliminen «Qazaqstan Respýblıkasynyń azamattaryn turǵylyqty jeri boıynsha tirkeý» qyzmetin tańdańyz.
3. Qajetti derekterdi engizip, tirkeý sebebin kórsetińiz.
4. Qyzmetke qol qoıýdyń qoljetimdi tásilderiniń birin paıdalanyńyz.
5. Ótinim mártebesin «Habarlamalar» → «Jeke kabınet tarıhy» bóliminen tekserýge bolady.

Menshik ıeleri nemese úleskerleri kámeletke tolmaǵan balalar, sondaı-aq sot sheshimimen áreketke qabiletsiz nemese áreket qabileti shekteýli dep tanylǵan adamdar sanalatyn turǵyn úı mekenjaıy boıynsha tirkeý tek oflaın — Halyqqa qyzmet kórsetý ortalyqtarynda júrgiziledi.

Onlaın formatqa kóshý oń statıstıkamen rastalyp otyr. 2025 jyldyń basynan beri Qazaqstanda turǵylyqty jeri boıynsha onlaın-tirkeý qyzmetin shamamen 750 myń adam paıdalandy, bul kórsetiletin qyzmetterdiń jalpy sanynyń 70 paıyzdan astamyn quraıdy.

Budan buryn jyljymaıtyn múlik obektilerine mekenjaı berý erejesi ózgeretini habarlandy.