Qazaqstanda azamattardy aldyn ala qaıta daıarlaıtyn jańa ortalyq qurylady
ASTANA. KAZINFORM - QR Eńbek jáne halyqty áleýmettik qorǵaý mınıstri Asqarbek Ertaev Jenevaǵa (Shveıtsarııa) jasaǵan jumys sapary aıasynda Halyqaralyq eńbek uıymy (HEU) uıymdastyrǵan Halyqaralyq eńbek konferentsııasynyń 114-sessııasynyń plenarlyq otyrysynda baıandama jasady.
Ol tehnologııalar men jasandy ıntellektiniń qarqyndy damýy jaǵdaıynda Qazaqstannyń áleýmettik-eńbek salasyn jańǵyrtýdyń negizgi baǵyttary týraly aıtty.
Mınıstr sessııa jumysyna Qazaqstan delegatsııasyn bastap barǵanyn aıta ketý kerek. Onyń quramyna jumys berýshiler men kásipodaqtar ókilderi kirdi.
Óz sózinde vedomstvo basshysy Qazaqstan HEU Bas dırektorynyń «Tańdaý sáti: laıyqty eńbekti qamtamasyz etý úshin jasandy ıntellektini paıdalaný» atty baıandamasynda aıtylǵan tujyrymdardy tolyq qoldaıtynyn atap ótti. Sonymen qatar ol 2026 jyl elimizde Tsıfrlandyrý jáne jasandy ıntellekt jyly bolyp jarııalanǵanyn aıtyp, bul eńbek naryǵyn basqarýda memlekettiń róline jańasha kózqaraspen qaraýǵa múmkindik beretinin jetkizdi.
-Búginde jasandy ıntellekt eńbek naryǵyn burynǵy tehnologııalyq revolıýtsııalarǵa qaraǵanda áldeqaıda jyldam ózgertip jatyr. Jasandy ıntellekt bolmaǵan kezeńde eńbek saıasaty kóbine saldarmen kúresýge negizdeldi. Adam jumysynan aıyrylsa – biz ony qaıta oqyttyq, óndiriste jazataıym oqıǵa bolsa – baqylaýdy kúsheıttik. Alaıda qazirgi jaǵdaı mundaı tásildiń jetkiliksiz ekenin kórsetip otyr. Sondyqtan álemdegi eńbek mınıstrlikteri saldarlarǵa áreket etýden ózgeristerdi aldyn ala boljaýǵa jáne derekterge negizdelgen táýekelderdi basqarýǵa kóshýi qajet, – dedi Asqarbek Ertaev.
Qazaqstanda jumyspen qamtýdy boljaýdyń ulttyq júıesi qalyptasyp keledi. Ol avtomattandyrý qaýpine ushyraýy múmkin mamandyqtardy aldyn ala aıqyndaýǵa múmkindik beredi.
Mınıstrdiń aıtýynsha, 2035 jylǵa qaraı jasandy ıntellekt Qazaqstandaǵy jumys kúshiniń shamamen 41%-yna belgili bir deńgeıde áser etedi.
Sonymen qatar tolyq avtomattandyrý qaýpi tónip turǵan jumys oryndarynyń úlesi 1%-dan az bolady. Bul mamandyqtardyń joıylýyn emes, olardyń ishindegi eńbek mindetteri men fýnktsııalarynyń qaıta qurylýyn bildiredi.
Azamattardyń jańa daǵdylardy meńgerýin qamtamasyz etý maqsatynda Memleket basshysynyń tapsyrmasymen Ulttyq kásipterdi transformatsııalaý ortalyǵy qurylý ústinde. Onyń aıasynda azamattar jumysynan aıyrylý qaýpi týyndamaı turyp-aq jeke traektorııalar boıynsha qaıta daıarlaý kýrstarynan óte alady. Sonymen birge Ulttyq biliktilik júıesi sheńberinde jańartylǵan ekonomıkanyń suranystaryna sáıkes 600-den astam kásiptik standart ózektendirilip jatyr.
Tehnologııalyq jańǵyrtý eńbek qaýipsizdigi salasyn da qamtyp otyr. Eńbek qatynastary salasynda qurylyp jatqan tsıfrlyq ekojúıe óndiristik jaraqattaný sebepteri men qyzmetkerler quqyqtarynyń buzylý táýekelderin erte kezeńde anyqtaý úshin jasandy ıntellekt sheshimderin paıdalanýǵa múmkindik beredi. Bul eńbek ınspektsııasynyń jumysyn baqylaýdan profılaktıkaǵa baǵyttaýǵa jol ashady.
Sonymen qatar elimizde proaktıvti qaǵıdat boıynsha jumys isteıtin jańa býynnyń tsıfrlyq jumyspen qamtý qyzmetteri engizilip jatyr. Jasandy ıntellekt tehnologııalary arqyly jumys izdeýshilerge bos jumys oryndary men oqytý múmkindikteri boıynsha jeke usynymdar qalyptastyrylady.
Búgingi tańda osyndaı 50 myńnan astam usynym berilgen. Jalpy alǵanda, joba aıasynda keminde 600 myń azamatty qamtý josparlanyp otyr.
-Jasandy ıntellekt memlekettik shekaramen bólinbeıdi. Sondyqtan bul baǵyttaǵy syn-qaterlerge jaýap ta birlesip qalyptastyrylýy qajet. Qazaqstan HEU-nyń jasandy ıntellektini engizý qyzmetkerlerdiń daǵdylaryn damytý, eńbek quqyqtaryn qorǵaý jáne áleýmettik dıalogty nyǵaıtýmen qatar júrýi tıis degen ustanymyn qoldaıdy. Biz ádilettilik, qaýipsizdik, ınklıýzıvtilik jáne adam qadir-qasıetin qurmetteý qaǵıdattaryna negizdelgen bolashaq eńbek naryǵynyń jahandyq kún tártibin qalyptastyrýǵa belsendi qatysýǵa daıynbyz, – dep túıindedi mınıstr.
Aıta keteıik, osyǵan deıin habarlaǵanamyzdaı, bıyl Qazaqstanda 44 myńnan astam adam jumyspen qamtylady.
