Elimizde az qamtylǵan otbasylardyń balalary balabaqshada tegin tamaqtanady
ASTANA. KAZINFORM — Kópbalaly, ataýly áleýmettik kómek (AÁK) alýǵa quqyǵy bar otbasylardan shyqqan balalardyń balabaqshadaǵy tamaǵy memleket esebinen tolyq óteledi.
Úkimet azamattarǵa áleýmettik kómek kórsetý qaǵıdalaryna ózgerister engizdi.
— Ataýly áleýmettik kómek alýǵa quqyǵy bar kópbalaly otbasylardan shyqqan balalarǵa, sondaı-aq memlekettik AÁK almaıtyn, biraq jan basyna shaqqandaǵy tabysy kúnkóris mınımýmynan tómen otbasylardan shyqqan balalarǵa mektepke deıingi uıymdarǵa barǵan kezeńde tamaqtanýǵa jumsalǵan shyǵyndar jergilikti bıýdjet esebinen 100% mólsherinde óteledi, — delingen qujatta.
Sonymen qatar, Qazaqstan Respýblıkasy Úkimetiniń qaýlysynda kórsetilgendeı, bilim berý kezeńinde áleýmettik kómek kórsetý bilim berý uıymdary nemese memlekettik organdar tarapynan júzege asyrylady. Ol úshin kámeletke tolǵan jetim balalar men ata-anasynyń qamqorlyǵynsyz qalǵan balalardyń, ata-analardyń nemese ózge de zańdy ókilderdiń erkin túrde jazylǵan ótinishi men rastaıtyn qujattar qajet.
Qaýly 2025 jylǵy 14 shildeden bastap kúshine endi.
Aıta keteıik, 2025 jylǵy 16 maýsymnan bastap Qazaqstanda ataýly áleýmettik kómek (AÁK) taǵaıyndaý men tóleýdiń jańartylǵan qaǵıdalary kúshine endi. Jańashyldyqtyń maqsaty — júıeni dálirek ári ádil etý. Endi kómek taǵaıyndaý kezinde ótinish berýshiniń kirisimen qatar shyǵysy da eskeriledi.