Qazaqstanda aıyppul salý protsesin qadaǵalaý kúsheıtiledi

ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý jónindegi komıtettiń tóraǵasy Baǵdat Mýsın el óńirlerine jasaǵan jumys sapary týraly baıandap berdi, dep habarlaıdy QazAqparat.

«Barlyq jerde ártúrli tájirıbe bar, ıaǵnı olardyń keıbiri jaqsy úrdis bolsa, qalǵandary kemshilikteri toly. Máselen, bir jerlerde ákimder tolyq qoldaý jasasa, al birqatar óńirde bul tek jospar deńgeıinde ǵana. Alaıda  Ákimshilik is júrgizýlerdiń biryńǵaı tizilimi is júzinde jumys istep tur. Osy oraıda Almaty men Astana kósh basynda. Sonymen qatar Taraz qalasyn da erekshe atap ótkim keledi», - dep jazdy B. Mýsın Facebook-tegi paraqshasynda. 

Onyń atap ótýinshe, Ákimshilik is júrgizýlerdiń biryńǵaı tizilimi aıyppul jazý boıynsha aǵymdaǵy protsesterdi avtomattandyrýmen qatar, barlyq foto/vıdeo tirkeý júıelerimen ıntegratsııany qamtıdy.

«Biryńǵaı standarttardyń bolmaýynan, sońǵy 10 jylda ár qala óz betinshe foto/vıdeo tirkeý júıelerin ornatyp keldi. Endi qazirgi kezde bunyń barlyǵy ıntegratsııalyq protsesterge tıisti qıyndyqtardy týyndatyp otyr. Sondyqtan aldaǵy ýaqytta osyndaı jaǵdaıǵa jol bermes úshin, biryńǵaı tizilim jobasy aıasynda «Sergek» ázirleýshilerimen birge protsessıng júıesi daıarlandy. Bul óz kezeginde ámbebap baǵdarlama retinde kez kelgen júıelerdiń barlyq aıyppuldaryn protsesten ótkizýge paıdalanylady», - dedi Baǵdat Mýsın.

Osy oraıda aıyppuldar týraly málimetterdi óńdeý men sheshim qabyldaý, aıyppul salýdyń durystyǵyn aıqyndaý sharalary eskerilip otyr.

Onyń sózine qaraǵanda, bul qadamdar ishki ister organdary qyzmetkerlerine atalǵan protsesti tirkemesten aıyppuldardy óshirýge ruqsat etpeıdi.

«Eger de barlyǵy Ákimshilik is júrgizýlerdiń biryńǵaı tiziliminde biriktirilse, organdardyń quzyretti qyzmetkerleri aıyppuldardy iz-túzsiz óshire almaıdy. Al qadaǵalaıtyn organ kabınetten shyqpastan, biryńǵaı tizilim júıesi kómegimen zańdylyqty baqylaıdy», - dep túsindirdi komıtet basshysy.