Qazaqstanda aıyppul habarlamalary onlaın tártipte jetkiziledi
ASTANA. QazAqparat - Ákimshilik aıyppuldar onlaın rejımde habarlanady. Bul týraly Parlament Májilisiniń jalpy otyrysynda QR Іshki ister vıtse-mınıstri Berik Bısenqulov málim etti, dep habarlaıdy QazAqparat.
«Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn talqylaý barysynda depýtat Qanat Mýsın qoldanystaǵy Kodekste ereje buzǵan adamǵa jeti kúnniń ishinde aıyppuldy 50 paıyz jeńildikpen tóleý quqyǵy qamtylǵanyn eske salyp ótti. Endi túzetýler aıasynda beıne kameralar men jyldamdyq ólsheıtin quraldarymen tirkeý arqyly anyqtalǵan jol erejesin buzý faktilerine de osyndaı quqyq berilmek.
«Bul el azamattary úshin kerek norma jáne osy túzetýdi qoldaımyn. Alaıda bul norma tıisti deńgeıde jumys istemeýi múmkin degen kúdik bar. Atap aıtqanda, búginde kólik ıeleriniń shaǵymdaryna súıensek, jyldamdyq ólshegishpen tirkelgen ereje buzýshylyq týraly uıǵarym olarǵa berilmeıdi. Al aıppuldar jaıynda olar tek HQKO-larda nemese sot oryndaýshylarynan ǵana habardar bolady. Osyǵan baılanysty Іshki ister mınıstrligi eskertý sharalaryn qamtamasyz etý úshin qandaı qadamdardy qarastyryp otyr?», - dep surady depýtat.
Óz kezeginde Іshki ister vıtse-mınıstri Berik Bısenqulov bundaı jaǵdaılar kóbinese kólik ıesi ózi tirkelmegen baspanada turýyna baılanysty oryn alýda. ıAǵnı, júrgizýshige eskertý baǵyttalǵanymen, habarlama ıesin tappaıdy.
«Alaıda ýaqytsha tirkeýge turý ınstıtýty engizilgennen keıin bul máselege qatysty tıisti sheshim jasaldy. Kólik ıesi turatyn naqty mekenjaıdy anyqtaýǵa múmkindik berildi. Osy turǵyda problema óz sheshimin tapty. Sonymen qatar biz Qazposhtadaǵy áriptesterimizben birlese tıisti jumystardy atqarýdamyz jáne aldaǵy jyldyń sońyna deıin eki aqparattyq júıeni ıntegratsııalaý boıynsha sharalardy aıaqtamaqpyz. Osydan keıin bizde onlaın rejımde eskertýlerdi jetkizýge jaǵdaı jasalady, sondaı-aq avtomatty tártipte eskertý jetkizilgeni týraly anyqtaımyz», - dep túsindirdi Bısenqulov.
Budan bólek, Ádilet mınıstri Marat Beketaev jańa kodekste osy problemaǵa baılanysty tıisti sheshim qarastyrylǵanyn atap ótti.
«Biz qosymsha tetikti usynyp otyrmyz, ıaǵnı bekitilgen tártipte quqyq buzýshyǵa eskertilgen sátten bastap qysqartylǵan óndiris úshin jeti kúndik merzim qoldanylady», - dedi mınıstr.
