Qazaqstanda aıyqtyrǵyshtar sanyn arttyrý qajet - Qasymov
ASTANA. QazAqparat - Qazaqstanda aıyqtyrǵyshtar sanyn arttyrý qajet. Bul týraly búgin QR Úkimeti otyrysynda elimizdiń Іshki ister mınıstri Qalmuhanbet Qasymov málim etti, dep habarlaıdy QazAqparat.
«Qazirgi ýaqytta elde nebári 31 ýaqytsha beıimdeý jáne detoksıkatsııa (medıtsınalyq aıyqtyrǵysh) ortalyǵy jumys isteıdi. Olardyń qajeti joq degen pikir de bar. Degenmen, medıtsınalyq aıyqtyrǵyshy joq shet el tájirıbesi ol jaqta osy sııaqty mekemeni qurý nemese kómek qyzmeti ne bolmasa medtsınalyq mekemeni tartý qajettigin kórsetip otyr. Bizdiń jaǵdaıda olardyń eldegi jelilerin maqsatty túrde keńeıtý qajet degen pikirdemiz jáne olardy eń aldymen áleýmettik medıtsınalyq mekeme retinde qarastyrý kerek», - dedi mınıstr.
Onyń sózine qaraǵanda, sońǵy 5 jylda mas kúıde jasalǵan qylmystardyń turaqty túrde artyp kele jatqany baıqalady. Mundaı qylmystardyń 10 paıyzy ishimdikke mas kúıinde turmystyq negizde jasalady. Máselen, aǵymdaǵy jyly mas kúıde jasalǵan qylmys sany 13 paıyzǵa ósken. Mundaı derekter Mańǵystaý, Almaty, Aqmola, Jambyl, Atyraý oblystarynda jıi oryn alýda.
Sonymen qatar mınıstr sot tártibimen maskúnemdikten májbúrli túrde emdeýge 2800-den astam adam jiberilgendigin aıtty.
«Olardyń árqaısysyn medıtsınalyq tekserýden ótkizý úshin ýchaskelik polıtsııa 10-15 jumys kúnin jumsaıdy. Osyǵan baılanysty qazirgi ýaqytta biz atalǵan tulǵalardy májbúrli emdeýge jiberýdiń qoldanystaǵy protsedýrasyn zańnamalyq ózgertý boıynsha usynys ázirleýdemiz», - dedi Q.Qasymov.
