Qazaqstanda áıelderge kómek kórsetetin 61 daǵdarys ortalyǵy jumys isteıdi
ASTANA. KAZINFORM — Qazaqstanda turmystyq zorlyq-zombylyqtan zardap shekken azamattarǵa kómek kórsetetin 61 daǵdarys ortalyǵy jumys isteıdi. Jyl basynan beri olarǵa 2400-den astam adam jiberilgen. Bul týraly Májiliste ótken dóńgelek ústelde Іshki ister mınıstriniń orynbasary Sanjar Ádilov aıtty.
— Olardyń 49-da jalpy syıymdylyǵy 1200 orynnan asatyn ýaqytsha panalaý oryndary bar. Jyl basynan beri bul uıymdarǵa 2400-den astam adam jiberildi, — dedi Sanjar Ádilov.
Onyń aıtýynsha, daǵdarys ortalyqtary azamattardyń qaýipsizdigin qamtamasyz etip qana qoımaı, psıhologııalyq, áleýmettik jáne quqyqtyq kómek kórsetedi.
Vıtse-mınıstr sondaı-aq respýblıka boıynsha 158 otbasyny qoldaý ortalyǵy jumys istep turǵanyn atap ótti.
— Kóptegen áıel úshin daǵdarys ortalyqtary jańa ómir bastaýǵa múmkindik beretin qaýipsiz orynǵa aınalyp otyr. Sondyqtan mundaı uıymdardyń orny erekshe, — dedi ol.
ІІM ókiliniń sózinshe, mınıstrlik daǵdarys ortalyqtarymen, bilim berý uıymdarymen, áleýmettik qorǵaý mekemelerimen jáne úkimettik emes uıymdarmen tyǵyz jumys júrgizip keledi.
Aıta keteıik, Almatyda turmystaǵy zorlyq-zombylyqtyń aldyn alatyn mekemearalyq jospar ázirlenip jatyr.
