Qazaqstanda áıelderdiń sút bezi qaterli isigine shaldyǵý kórsetkishi eýropalyq kórsetkishten asyp túsip otyr - S. Dıqanbaeva
ALMATY. 9 aqpan. QazAqparat /Erbol Turymbetov/ - Qazaqstanda sońǵy 3 jylda tekserýden ótken áıelderdiń sút bezi isigine shaldyǵý kórsetkishi eýropalyq ortasha kórsetkishten asyp túsip otyr.
Bul týraly búgin Salaýatty ómir saltyn qalyptastyrý máseleleri Ulttyq ortalyǵynyń dırektory Sáýle Dıqanbaeva Almatyda ótken baspasóz máslıhatynda málimdedi.
2008 jyldan beri Skrınıngtik zertteýlerdiń ulttyq baǵdarlamasy júrgizilip keledi. S. Dıqanbaevanyń aıtýynsha, osy baǵdarlama aıasynda tekserýden ótken 3 mln.-nan astam qyz-kelinshekterdiń ishinen 0,14 paıyzy, sút bezi qaterli isigine (eýropalyq standart - 0,3 paıyz), 0,003 paıyzy jatyr moıny qaterli isigine (eýropalyq standart - 0,001-0,002 paıyz) shaldyqqan. «Bul aýrýǵa shaldyqqandardyń 43 paıyzdyq bóliginiń aldyn alýǵa bolady. Ol úshin balalardyń shylym shegýine tyıym salý, aýrýdyń paıda bola bastaǵan belgileriniń aldyn alý, sportpen shuǵyldaný, durys tamaqtaný, osy aýrýdy týǵyzatyn vırýstarǵa qarsy vaktsınalar egý sııaqty sharalar qoldaný kerek», - dedi Ulttyq ortalyq dırektory.
Onyń sózine qaraǵanda, skrıng tekserý ádisimen profılaktıkalyq qaraýlardy jetildirý úshin medıtsınalyq mekemeler 111 mammografpen qamtylǵan, sút bezi men jatyr moıny dertterin erte anyqtaý úshin arnaıy mamandar oqytylǵan.
Aıta ketetini, sońǵy 5 jylda erte dıagnostıka, skrıng baǵdarlamalar men emdeýdiń zamanǵa saı tıimdi keskinderin engizý nátıjesinde ólim-jitim kórsetkishi 100 myń turǵynǵa shaqqanda 114,4-ten 104,0-ge deıin kemigen.
