Qazaqstanda áıelder obyrdan emdelgennen keıin de dúnıege bala ákele alady
Reprodýktıvtik medıtsına ınstıtýtynda obyrǵa shaldyqqan 3 áıelge reprodýktıvtik densaýlyǵyn qalpyna keltirý otalary sátti jasaldy. Emdeý sharalary bitkennen keıin olar balaly bola alady.
Onkologııalyq naýqastardyń analyq bezi tinderin krıokonservatsııalaý otalarynyń ózektiligi sonda, sońǵy jyldary reprodýktıvtik fýnktsııalaryn tabysty iske asyra almaǵan jas áıelderde qaterli isik aýrýlaryn anyqtaý jaǵdaılary artý túsýde.
Obyrdy emdeýde qoldanylatyn hımıoterapııa, sáýlelik terapııa sııaqty ádister gonadotoksıkalyq áser etedi. Áıelder bala kótere almaı, bedeýlik paıda bolady.
Innovatsııalyq ádisterdi endirý úshin Reprodýktıvtik medıtsına ınstıtýtyna Japonııanyń ýnıversıtettik klınıkasynan mamandar shaqyryldy. Analyq bezi tininen laparoskopııalyq alý jáne krıokonservatsııalaý sharalaryn japondyq professorlar qazaqstandyq mamandarmen birge atqardy. Operatsııa hımıoterapııa alýy tıis 3 áıelge jasaldy.
Eritilgen analyq bezi tininiń aýtotransplantatsııasy onkolog-dárigerlerdiń qorytyndysyna sáıkes áıelderdi saýyqtyrý úshin jasalady.
Otandyq hırýrgtermen birge ota jasaǵan professor Nao Sýzýkı: «Hımııa-sáýlelik terapııamen emdeýden keıin bolýy yqtımal zardaptar jáne reprodýktıvtik fýnktsııalardy saqtaý ádisteri jóninde naýqastarǵa aıtý - onkolog-dárigerlerdiń paryzy. Búgingi tańda medıtsına jańa sheshimder usynýǵa qaýqarly. Qazaqstannyń bul salada kóshten qalmaı kele jatqany qýanyshty»,-deıdi.
Reprodýktıvtik medıtsına ınstıtýtynyń dırektory Tamara Júsipálıeva óz kezeginde: «Onkologııalyq naýqastarǵa reprodýktıvtik fýnktsııalaryn, dúnıege bala ákelý qabiletin saqtaýǵa kómektesý bizdiń mindetimiz. Qazaqstanda munyń shyndyqqa aınalǵany bizdi qýantady. Bizdiń ınstıtýtta onkologııalyq naýqastarǵa mundaı kómek tegin kórsetiledi. Joba tek qaıyrymdylyq maqsatynda iske asyrylady»,- dep atap ótti.
Belgııada Hodjkın lımfomasynan tolyq emdelip shyqqan áıelge 6 jyldan soń eritilgen krıokonservatsııalanǵan analyq bezi tinderin qaıta salǵannan keıin alǵashqy bala 2004 jyly dúnıege keldi. Bul ádisti qoldaný arqasynda búgingi deıin 40 bala týyldy.