Elde áıelder kásipkerligin baǵalaıtyn Gender Index platformasy ázirlenedi
ASTANA. KAZINFORM — Qazaqstanda áıelderdiń ekonomıkadaǵy rólin baǵalaýǵa arnalǵan Gender Index analıtıkalyq platformasy ázirlenedi jáne bul memlekettik saıasatty jetildirýge jáne kásipkerlikti damytýǵa jańa serpin beredi. Bul týraly Jasandy ıntellekt jáne tsıfrlyq damý vıtse-mınıstri Rostıslav Konıashkın aıtty.
Onyń sózinshe, áleýmettik jobalar búginde eldiń tehnologııalyq damýy men turaqty ekonomıkalyq ósiminiń mańyzdy faktoryna aınalyp otyr. Olar ekonomıkalyq qundylyq qalyptastyryp qana qoımaı, adamı kapıtaldy damytýǵa, jańa jumys oryndaryn ashýǵa jáne el men óńirlerdiń ınvestıtsııalyq tartymdylyǵyn arttyrýǵa yqpal etedi.
— Sondyqtan Gender Index bastamasyn der kezinde qolǵa alynǵan ári ózekti joba dep sanaımyz. Áıelderdiń ekonomıkaǵa qatysý deńgeıin, kásipkerliktiń qazirgi ahýalyn jáne óńirlik damý kórsetkishterin keshendi baǵalaýǵa múmkindik beretin analıtıkalyq platformanyń qurylýy memlekettik basqarý sheshimderiniń tıimdiligin arttyryp, memlekettik saıasatty jetildirýge sep bolady, — dedi R. Konıashkın.
Vıtse-mınıstr bul joba baqylaý nemese retteý quraly emes ekenin erekshe atap ótti. Gender Index — memleketke, bızneske jáne sarapshylar qaýymdastyǵyna sheshim qabyldaý kezinde obektıvti derekter men dáleldi taldaýǵa súıenýge múmkindik beretin analıtıkalyq qural.
Spıkerdiń aıtýynsha, Qazaqstan memlekettik qyzmetterdi tsıfrlandyrý jáne tsıfrlyq ınfraqurylymdy damytý boıynsha álemdegi kóshbasshy elderdiń biri sanalady.
Qazir Ulttyq bank pen Qarjy mınıstrligimen birlesip kásipkerlerge arnalǵan biryńǵaı tsıfrlyq keńistik — eGov Business platformasy damytylyp jatyr. Onda memlekettik qyzmetter, bıznesti qoldaý tetikteri jáne ózge de tsıfrlyq servıster qoljetimdi.
— Sonymen qatar, eldegi kásipkerlik belsendilik pen ekonomıkalyq protsesterdi jan-jaqty taldaýǵa múmkindik beretin «Bıznes kartasy» analıtıkalyq platformasy da jumys isteıdi. JI tehnologııalary mundaı taldaýdyń múmkindigin edáýir keńeıtedi. Olar úlken kólemdegi derekterden zańdylyqtardy anyqtaýǵa, ekonomıkanyń jekelegen salalarynyń damý úrdisin boljaýǵa jáne óńirlerdegi jańa ósý núktelerin aıqyndaýǵa múmkindik beredi, — dedi ol.
Rostıslav Konıashkın mınıstrliktiń óńirlik ІT-kásipkerlikti jáne elimizdegi ІT-habtar jelisin damytýǵa basymdyq berip otyrǵanyn aıtty. Onyń málimetinshe, birneshe jyl buryn iske qosylǵan IT-Aiel baǵdarlamasy qyz-kelinshekterdi baǵdarlamalaý men tsıfrlyq daǵdylarǵa úıretýde jaqsy nátıje kórsetken.
— Jalpy, ІT salasy — teń múmkindik qaǵıdaty tolyq iske asqan baǵyttardyń biri deýge bolady. Búginde qyzdar men áıelder Qazaqstannyń startap ekojúıesiniń belsendi qatysýshylaryna aınalyp, tehnologııalyq kompanııalar quryp, ınnovatsııalyq jobalardy tabysty júzege asyryp keledi, — dedi vıtse-mınıstr.
Vıtse-mınıstrdiń aıtýynsha, mınıstrlik Gender Index jobasyn ázirleý men damytýǵa tsıfrlyq memlekettik ınfraqurylym, elektrondyq úkimet, memlekettik derekter jáne tsıfrlyq platformalar arqyly jan-jaqty qoldaý kórsetýge daıyn.
— Memleket, halyqaralyq seriktester, sarapshylar qaýymdastyǵy jáne bıznes kúsh biriktirse, kásipkerlikti damytýǵa, adamı kapıtaldy nyǵaıtýǵa jáne Qazaqstan ekonomıkasynyń básekege qabilettiligin arttyrýǵa qyzmet etetin tıimdi analıtıkalyq qural qalyptastyra alamyz, — dep túıindedi Rostıslav Konıashkın.
Buǵan deıin Premer-mınıstr orynbasary — Mádenıet jáne aqparat mınıstri Aıda Balaeva Qazaqstandaǵy bıznes sýbektileriniń jartysyna jýyǵyn áıelder basqaratynyn aıtqan edi.
Sondaı-aq Qazaqstandaǵy árbir tórtinshi JOO-ny áıelder basqarady.
