Qazaqstanda áıelder erler jalaqysynyń 67 paıyzyn ǵana alady - BUU
«Búgingi shara elimizdegi áıelderdiń ekonomıkalyq múmkindikterin baǵalaýǵa jáne ony arttyrýǵa baǵyttalyp otyr. Qazirgi tańda Qazaqstannyń ekonomıkasy da, áıelderdiń ekonomıkaǵa aralasý deńgeıi de artyp keledi. Alaıda jalpy jaǵdaı biz oılaǵandaı boldy deýge áste kelmeıdi. Iá, shaǵyn jáne orta bzneste áıelderdiń jetekshi bolyp júrgenin jıi kórýge bolady. Alaıda negizinen basshylyqta kóbinese er adamdardyń otyrǵanyn atap ótý kerek. Qazaqstanda er adamdar men áıelderdiń aılyǵynyń aıyrmashylyǵy aıqyn baıqalady», - deıdi ol elordada «Qazaqstandaǵy áıelderdiń ekonomıkalyq quqyqtary men múmkindikterin keńeıtý: tájirıbe, syn-qaterler jáne perspektıvalar» atty konferentsııada.
Ileın Konkevıchtiń aıtýynsha, er adamdar men áıelderdiń úıdegi mindettemelerin zertteý kerek.
«Ekonomıka salasyna áıelderdiń úlesin arttyrý baǵytynda búgin utymdy usynystardy tyńdaımyn degen úmitim bar. Sonymen qatar, áıelder jumys oryndary boıynsha konkýrstarǵa qatysa alatyndaı áleýmettik júıeni qoldaý kerek. Bul rette kóbirek balabaqsha men úıdegi mindettemelerdi atqarýda erlerden qoldaý qajet. Ásirese, ınvestıtsııa, ınfraqurylym, energetıka, kólik sekildi salalarda áıelderdiń jumys isteýi sırek. Aýyldaǵy áıelderdi qoldaý boıynsha jobalardyń baryn atap ótý kerek», - deıdi ol.
Ileın Konkevıchtiń sózine qulaq assaq, erler men áıelderdiń aılyqtarynyń arasyndaǵy aıyrma 33 paıyzdy quraıdy.
«Qazirgi tańda áıelder er adamdardyń aılyǵynyń 67 paıyzyn ǵana alyp otyr. Álbette, iri kompanııalardy basqaryp otyrǵan áıelderdiń baryn aıta ketý kerek. Dese de, olardyń sany az. Kóbinese, atap ótkenimdeı, áıelder tek shaǵyn jáne orta bızneste jetekshilik etýde», - deıdi Ileın Konkevıch.