Qazaqstanda áıelder densaýlyǵyn qorǵaý naýqany bastaldy
ASTANA. 23 qazan. QazAqparat - Qazaqstanda 23 qazan men 3 qarasha aralyǵynda Dúnıejúzilik densaýlyq uıymynyń (DDSU) qoldaýymen «Áıelder densaýlyǵyn qorǵaý» uranymen onkúndik ótedi.
Bul týraly búgin Astanada ótken baspasóz máslıhatynda QR Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Ajar Tóleǵalıeva málim etti.
«Qaterli isik aýrýlarynyń qazirgi kezde kúrdeli másele ekendigi, ıaǵnı osy indet elimizdegi ólim-jitim sebepteriniń biri bolyp otyrǵandyqtan atalǵan onkúndik aıasynda áıelder arasyndaǵy onkologııalyq aýrýlar jóninde aýqymdy aqparattyq jumys júrgiziledi»,-dedi departament basshysy.
DDSU málimetine qaraǵanda, jyl saıyn álemde sút bezi obyry dertine shaldyqqan 1,4 mln. jaǵdaı anyqtalyp, 460 myńdaı ólim-jitim tirkeledi. Osyǵan oraı jylda qazan aıynda dástúrli túrde qaterli dertke qarsy is-sharalar uıymdastyrylady.
Onkúndik barysynda dárigerler tıisti túsindirý jumystaryn júrgizedi, sondaı-aq medıtsınalyq qyzmetkerler úshin semınarlar men trenıngter, al emhanalarda «ashyq esik» kúnderi ótkiziledi. Buǵan qosa ata-analarmen, pedagogtarmen, jasóspirimdermen kezdesýler uıymdastyrylady.
