Qazaqstanda áıelder basshylyq jasaıtyn kompanııalar sany 7% artty
NUR-SULTAN. QazAqparat – Jyl basynda elimizde jumys istep turǵan 330,3 myń kompanııa tirkeldi. Bul bir jyl burynǵy kórsetkishten 7,2 paıyzǵa kóp, dep habarlaıdy QazAqparat tilshisi.
Ranking.kz portalynyńmálimetinshe, atalǵan kompanııalardyń 99 myńyna áıelder basshylyq jasaıdy jáne kórsetkish 1 jyldyń ishinde 7 paıyzǵa artyp otyr. Jalpy, elimizde úshinshi jyl qatarynan jumys istep turǵan kompanııalarda basshylyq laýazymdaǵy áıelderdiń úlesi 30 paıyzdy quraıdy.
Orta kompanııalarǵa jetekshilik etetin áıelderdiń úlesi óte joǵary ári jyldan jylǵa artyp, qazirgi ýaqytta kórsetkish 35,7 paıyzǵa jetip otyr. Al shaǵyn kompanııalarda basshylyq jasaıtyn áıelder úlesi 30-dan 29,9 paıyzǵa azaıdy. Sońǵy jyldary iri kompanııalarda da basshylyq qyzmet atqaratyn áıelderdiń kórsetkishi 18,8 paıyzdan 18 paıyzǵa kemigen.
Dúnıejúzilik ekonomıkalyq forýmnyń genderlik teńsizdiktiń oryn alyp otyrǵan deńgeıi boıynsha Global Gender Gap Report 2020 baıandamasynda aıtylǵandaı, Qazaqstan 153 eldiń ishinde 72-orynda tur. Al EAEO elderi arasynda Belarýstyń kórsetkishi úzdik. Bul el reıtıngtiń 29-ornyna ilikken. Reseı – 81, Qyrǵyzstan – 93, al Armenııa 98-orynǵa turaqtaǵan.
