Qazaqstanda «Aıbyn» áskerı-patrıottyq jastar jıyny bastaldy
Bıyl jıynǵa elimizdiń barlyq óńirinen 40 komanda qatysady. Olar - oblystardaǵy, Nur-Sultan, Almaty jáne Shymkent qalalaryndaǵy áskerı-patrıottyq klýbtardyń, Qarýly kúshterdiń, basqa da áskerler men áskerı quralymdardyń, áskerı kolledjderdiń, mektep-ınternattardyń, «Jas ulan» respýblıkalyq mektepteriniń 14-18 jas aralyǵyndaǵy 600-ge jýyq qatysýshy.
Jıyn baǵdarlamasy áskerı-qoldanbaly jáne áskerı-sporttyq jarystardan turatyn 11 saıysty qamtıdy. Jas patrıottar «Aıbyn daryny» oıyny barysynda ózderiniń zııatkerlik qabiletterin kórsetedi. «Aıbyn juldyzy» shyǵarmashylyq baıqaýynda jáne «Jas sarbaz – jas tilshiler» jýrnalıstik baıqaýynda talanttaryn pash etedi.
Arqan tartý jáne áskerılendirilgen estafeta barysynda qatysýshylardyń dene daıyndyǵynyń deńgeıi, kúshi, tózimdiligi men jyldamdyǵy baǵalanatyn bolady.
Pnevmatıkalyq vıntovkadan oq atý, avtomatty bólshektep-jınaý, gaz tumyldyryǵy jáne jalpyáskerı qorǵanys jıyntyqtaryn kııý kezinde jas patrıottardan naqty, dál ári anyq oryndalǵan áreketter talap etiledi.
«Smart Sarbaz» ónertapqyshtar saıysy barysynda jas baǵdarlamashylar IT-ázirlemeleri men tehnıkalyq sheshimderin usynady.
Aqtyq synda «Kúshimiz birlikte» áskerı-dalalyq taktıkalyq oıyny ótedi. Onda bolashaq Otan qorǵaýshylar áskerı qyzmetpen baılanysty praktıkalyq mindetterdi oryndaıdy, komandada jumys isteý tájirıbesin meńgeredi, ózderiniń moraldyq jáne kúsh-qýat turaqtylyǵyn tekseredi.
Aıta keteıik, «Aıbyn» respýblıkalyq jıynyna qyzyǵýshylyq jyl saıyn artyp keledi. Uıymdastyrý komıtetine jıynǵa qatysý úshin komandalyq ótinimderden bólek, jeke ótinishter de túsip jatqany sonyń dáleli. Bul saıyskerler onlaın rejımde óner kórsetetin bolady. Al jıynǵa qatysýshylardyń negizgi bóligi polıgonda baq talastyrady.
«Aıbyn» VIII respýblıkalyq áskerı-patrıottyq jastar jıyny bir aptaǵa jalǵasyp, 24 maýsymda aıaqtalady.
