Qazaqstanda «Aıbyn-2026» halyqaralyq áskerı-patrıottyq jıyny bastaldy
ASTANA. KAZINFORM – Aqmola oblysyndaǵy Shoqan Ýálıhanov atyndaǵy áskerı kolledjdiń «Amandyq» oqý polıgonynda 53 komanda baq synap jatqan «Aıbyn-2026» XII halyqaralyq áskerı-patrıottyq jastar jıyny bastaldy. Jarystar atalǵan polıgon bazasynda uıymdastyrylyp jatyr.
Bıyl halyqaralyq mártebege ıe bolǵan aýqymdy jıynǵa Qazaqstan, Ázerbaıjan, Qyrǵyzstan, Reseı jáne Ózbekstannan kelgen 1000-ǵa jýyq jas patrıot qatysyp jatyr. Jarys alańynda áskerı-patrıottyq klýbtardyń tárbıelenýshileri, áskerı oqý oryndarynyń kýrsanttary men kúshtik qurylymdardyń jas ókilderi túrli baǵyttaǵy syndarǵa qatysyp, ózara tájirıbe almasyp jatyr.
Jıynnyń resmı ashylýynda QR Qorǵanys mınıstriniń tárbıe jáne ıdeologııalyq jumys jónindegi orynbasary Asqar Mustabekov sóz sóılep, «Aıbyn» jobasynyń mańyzdylyǵyna toqtaldy.
– Halyqaralyq «Aıbyn» jıyny – ártúrli memleketterdiń jastary arasyndaǵy dostyq pen yntymaqtastyqty nyǵaıtatyn, otansúıgishtik rýhty qalyptastyratyn, kóshbasshylyq qabiletterdi damytyp, áskerı dástúrlerdi qurmetteýge tárbıeleıtin biregeı alań. Bul jıyn árbir qatysýshy úshin jańa tájirıbe, jańa tanystyqtar men úlken jetistikterge bastaıtyn mańyzdy qadam bolady dep senemin, – dedi ol.
Onyń aıtýynsha, «Aıbyn» jobasy 2015 jyldan bastaý alady jáne ol «Jas sarbaz» áskerı-patrıottyq qozǵalysynyń odan ári damýyna negiz bolǵan.
– «Aıbynnyń» jetistikteriniń biri – bul jıyndardyń «Jas sarbaz» qozǵalysynyń qurylýyna serpin berýi. Bul qozǵalys tutas bir patrıottar býynyn tárbıeledi, olardyń kópshiligi búginde elimizdiń áskerı jáne azamattyq joǵary oqý oryndarynda bilim alyp, Qazaqstannyń ıgiligi úshin qyzmet etýge daıyn, – dedi ol.
Onyń aıtýynsha, 2023 jyldan bastap jıyn halyqaralyq deńgeıge kóterilgen.
– Bıyl «Aıbynǵa» Ázerbaıjan, Qyrǵyzstan, Reseı jáne Ózbekstannan kelgen jastar qatysyp jatyr. Bul jastardyń patrıottyq tárbıesine ǵana emes, memleketterimiz arasyndaǵy dostyq qarym-qatynasty nyǵaıtýǵa da yqpal etedi, – dedi mınıstrdiń orynbasary.
Búgingi baǵdarlama aıasynda «Aıbyn daryny» zııatkerlik oıyny uıymdastyryldy. Saıys barysynda qatysýshylar Qazaqstan tarıhy, álem tarıhy, Konstıtýtsııa negizderi, quqyqtyq memleket qaǵıdattary jáne Otan qorǵaýshylar taqyryby boıynsha bilimderin synǵa saldy.
Forým baǵdarlamasyna sporttyq, zııatkerlik, ǵylymı-tehnıkalyq jáne mádenı is-sharalar engizilgen. Negizgi baǵyttardyń qatarynda Smart Sarbaz robototehnıka baıqaýy, «Aıbyn daryny» zııatkerlik oıyny, áskerı-qoldanbaly jarystar men taktıkalyq saıystar bar.
Sonymen qatar QR Qarýly kúshteri Ulttyq áskerı-patrıottyq ortalyǵynyń tárbıe-ıdeologııalyq jáne áskerı-patrıottyq jumys bóliminiń ofıtseri Eńlik Erjanova baıqaýdyń mazmuny týraly aıtty.
– Biz qatysýshylardyń ıntellektisi men erýdıtsııasyn baǵalaımyz. Suraqtar Qazaqstan tarıhyn, álemdik tarıhty, sondaı-aq Konstıtýtsııa men Otan qorǵaýshylar taqyrybyn qamtıdy. Jeńimpazdar keıin taktıkalyq oıyndardyń fınaldyq kezeńinde kezdesedi, – dedi ol.
Odan keıin Smart Sarbaz robototehnıka jarysy ótip, qatysýshylar drondar, robototehnıka jáne jasandy ıntellekt baǵytyndaǵy jobalaryn tanystyrdy.
Joba jetekshisi Oljas Samarhanov bul baǵyttyń mańyzyna toqtaldy.
– Búgingi jobalar shynymen tańǵaldyrady. Biz drondar, robototehnıka jáne jasandy ıntellekt baǵyttary boıynsha jumys isteımiz. Mundaı jarystar jastarǵa tek fızıkalyq emes, sonymen qatar tehnologııalyq daǵdylardy meńgerýge múmkindik beredi, – dedi ol.
Smart Sarbaz alańynda usynylǵan jobalardyń biri – «Áskerı jerserik». Joba avtory Dılnaz Eslıamova óz ıdeıasyn tanystyrdy.
– Bizdiń jerserik ártúrli áskerı tehnıkany anyqtap, aqparatty shtabqa jiberedi. Jasandy ıntellekt kómegimen júıe tankter men basqa da tehnıkalardy tanıdy, – dedi ol.
Qorǵanys mınıstrliginiń Sport komıtetiniń tóraǵasy Arman Ábeýov áskerı-patrıottyq tárbıeniń mańyzyn atap ótti.
– Áskerı-patrıottyq tárbıeleý jastar úshin óte mańyzdy. Jarys pen dostyq arqyly olar bolashaqta qajet bolatyn tájirıbe jınaıdy. Munda bolashaq serjanttar men ofıtserler bir-birimen tanysyp, dalalyq jaǵdaılarǵa beıimdeledi. Qatysýshylar áskerı qyzmetke barynsha jaqyn ortada ómir súrip, daıyndyqtan ótedi, – dedi ol.
Kúnniń ekinshi jartysynda qatysýshylar dene daıyndyǵy boıynsha normatıvter tapsyryp, áskerı-qoldanbaly sport túrlerinen baq synady. Uldar beltemirge tartylý jattyǵýyn oryndasa, qyzdar shalqasynan jatqan qalypta deneni kóterý normatıvin tapsyrdy. Jarystar barysynda jastar tózimdilik, kúsh-qaırat jáne áskerı qyzmetke qajetti fızıkalyq daıyndyq deńgeıin kórsetti.
Reseıdiń «ıÝNARMIıA» búkilreseılik áskerı-patrıottyq qozǵalysy bas shtabynyń múshesi Pavel Mamontov halyqaralyq jıyn týraly pikir bildirdi.
– Biz halyqaralyq «Aıbyn» jıynyna úshinshi jyl qatarynan qatysyp kelemiz jáne uıymdastyrý deńgeıiniń jyl saıyn artyp kele jatqanyn baıqap otyrmyz. Bizdi árdaıym óte qonaqjaı qarsy alady, al memleket tarapynan jastardy áskerı-patrıottyq tárbıeleýge kórsetilip otyrǵan kóńil erekshe joǵary baǵalaýǵa laıyq, – dedi ol.
Sonymen qatar QR Qarýly kúshteri Áskerı-tarıhı mýzeıiniń «Uly dala murasy: ejelgi dáýirden Qazaq handyǵyna deıingi sabaqtastyq» atty kóshpeli kórmesi uıymdastyryldy.
Mýzeıdiń ekskýrsııa bóliminiń mamany Saltanat Seleýbaevanyń aıtýynsha, ekspozıtsııa tas dáýirinen bastap Qazaq handyǵy kezeńine deıingi tarıhty qamtıdy.
– Munda tas, qola jáne temir dáýirleriniń, Túrik qaǵanatynyń, Altyn Ordanyń jáne Qazaq handyǵynyń jádigerleri usynylǵan. Ekspozıtsııada Abylaı hannyń músini erekshe oryn alady. Bıyl onyń týǵanyna 315 jyl tolyp otyr, – dedi ol.
Halyqaralyq jıyn aldaǵy kúnderi de jalǵasyp, qatysýshylardy áskerı-taktıkalyq oıyndar, sporttyq jáne zııatkerlik saıystar kútip tur.
Buǵan deıin alty eldiń jastary qatysatyn «Aıbyn-2026» XII halyqaralyq áskerı-patrıottyq jastar jıynyna daıyndyq barysy týraly jazǵan bolatyn.
