Qazaqstanda aıazǵa tózimdi júgeri ósirý qolǵa alynady

ASTANA. QazAqparat - Amerıkalyq Baumgartner Agriculture Science and Service (BASS) pen qazaqstandyq Kusto Group kompanııalary Qazaqstanda aldyńǵy tehnologııalardy qoldana otyryp, jem-shóptik daqyldardyń tuqymyn óndiretin birlesken kásiporyn qurady, dep habarlaıdy QazAqparat tilshisi.

Búgin Kusto Group dırektorlar keńesiniń tóraǵasy Erkin Tátishev jáne BASS ıesi jáne bas dırektory Edvard Djosef Baýmgartner KAZSEED kásiporynyn qurý týraly memorandýmǵa qol qoıdy. Sharaǵa QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev qatysty.

«2017-2021 jyldarǵa arnalǵan AÓK-ti damytýdyń memlekettik baǵdarlamasyn júzege asyrý aıasyndaǵy mindetterdiń biri shetel ınvestorlaryn, úlken ınnovatsııalyq kompanııalardy tartý bolyp otyr. Maqsat - taıaý bes jylda eńbek ónimdiligin 2,5 ese arttyrý úshin jańa tehnologııalardy, jańa ǵylymı ázirlemelerdi tartý. Ótken jylǵy Prezıdent saparynyń qorytyndysy boıynsha amerıkalyq kompanııalarmen jumys istep jatqanymyzdy bilesizder. Búgin mine tuqym óndiretin birlesken kásiporyn qurý týraly alǵashqy shartqa qol qoıyldy», - dedi Ómirzaq Shókeev.  

Kusto Group dırektorlar keńesiniń tóraǵasy Erkin Tátishev tuqym sharýashylyǵy salasyndaǵy osyndaı mamandandyrylǵan kompanııanyń paıda bolýy ósimdik sharýashylyǵyn damýy úshin óte mańyzdy qadam bolyp tabylatynyn atap ótti. Ozyq tehnologııalar men osy saladaǵy amerıkalyq seriktesterdiń quzyrettiligi úrdisterdi tuqym óndirýge ǵana emes, sonymen qatar selektsııalyq jumystarǵa da jumsaýǵa múmkindik beretindigin aıtty. Munan bólek, Erkin Tátishev aıazǵa tózimdi júgeri tuqymyn alý jumystary bastalatyndyǵyn jetkizdi.