Qazaqstanda Aıaz Ata men Aqshaqardy úıge shaqyrý qyzmeti qansha
ASTANA. KAZINFORM — Jańa jylda Aıaz Ata men Aqshaqardy úıge shaqyrý qyzmeti keıbir óńirde qaltany qaǵady. Baǵa aldyn ala daıyndalǵan baǵdarlamaǵa qaraı ártúrli. Keıbir aımaqta tipti tórt ese aıyrmashylyq baıqaldy, dep habarlady Kazinform agenttiginiń tilshisi.
Qarbalasqa toly kúnderi ata-ana balasyna erekshe kóńil-kúı syılap, olardy jańajyldyq qýanyshqa bóleıdi. Syılyqty usynýdyń joly — Aıaz Ata men Aqshaqardy shaqyrý. Búginde akter men aktrısa úıińizge kelip, balańyzben sóılesip, onyń daıyndaǵan óleń shýmaqtaryn tyńdap, qolyna syılyǵyn usynady. Qyzmettiń bul túrine suranys jyl ótken saıyn artyp keledi. Soǵan saı baǵasy da ózgergen.
Qymbaty Almaty qalasynda tirkeldi. Megapolıste tańdaý keń ári suranysqa saı túrli baǵdarlama da usynady. Aıaz Ata men Aqshaqar úıińizde 30 mınýt aıaldasyn deseńiz, 60 myń teńge tóleısiz. Al korporatıv keshi men basqosýǵa shaqyrý quny 100 myń teńge jáne odan joǵary. Baǵa kıimine, olardyń stsenarııi men anımatorlardyń kásibıligine tikeleı baılanysty.
Al elimizdiń ońtústiginde bul qyzmettiń baǵasy odan tómen. Túrkistan qalasynda jarty saǵattyq qyzmet quny orta eseppen 35-40 myń teńge bolyp tur. Aıaz Ata men Aqshaqar óz baǵdarlamasyn usynady, balalarǵa arnap oıyn uıymdastyrady. Eger balalardy úıge jıyp, ádemi kesh uıymdastyrsa, mundaı qyzmetke 50 myń teńge jáne odan joǵary aqy suraıdy.
Astana qalasynda qyzmettiń bul túri óte jaqsy damyǵan. Munda ondaǵan agenttik uıymdastyrýmen aınalysady. Soǵan saı baǵa da ártúrli. Máselen 5-10 mınýtttyq quttyqtaý qyzmeti úshin 15 myń teńge tóleýge týraly keledi. Al 30 mınýtqa shaqtalǵan baǵdarlama usynsa, qyzmetine 25-45 myń teńge alady. Túrli baıqaý uıymdastyryp, oıyn oınatady.
Qaraǵandy, Qonaev pen Jezqazǵanda orshata baǵa — 30 myń teńge. Sonyń ishinde Qaraǵandy men Jezqazǵanda tańerteń jáne kúndiz shaqyrsańyz, aqsha únemdeýge bolady. Bul kezde qysqa ǵana quttyqtaý qyzmetiniń quny 5 myń teńgeden bastalyp, túnde 15 myń teńgege deıin kóteriledi. Al 20-25 mınýttyq quttyqtaý qyzmetine oıyndar, túrli konkýrs pen syılyq usyný qyzmeti kirse, fotoǵa tússe shamamen 18-40 myń teńge suraıdy. Al 30-31 jeltoqsan kúnderi baǵa edáýir ósedi. Qonaev qalasynda da usynys óte kóp. Ortasha baǵa osy tektes.
Atyraý qalasynda jańajyldyq baǵdarlama baǵasy qyzmettiń sapasyna qaraı ózgeredi. Jergilikti agentttikter tolyqqandy quttyqtaý qyzmetin 20-35 myń teńgege baǵalap otyr.
Óskemen qalasynda baǵa 15-35 myń teńge aralyǵynda. Al 31 jeltoqsan kúni keshkilik jáne Jańa jyl túni baǵa ósip, 20 mınýttyq baǵdarlama úshin 50 myń teńge alady.
Tarazda baǵa Aıaz Ata men Aqshaqardy somdaıtyn adamǵa qaraı ózgerip otyrady. Ártister shaǵyn ǵana quttyqtaýǵa 5-10 myń teńge suraıdy. Al anımatorlardyń shoý baǵdarlamasy, ádemi áýen men oıyn-saýyq qosylsa, 15-30 myń teńge bolady.
Taldyqorǵanda Aıaz Ata men Aqshaqardy úıge shaqyrý qyzmeti 18 myń teńgeden bastalyp, 25 myń teńgege deıin jetedi. Baǵa baǵdarlama men onyń uzaqtyǵyna qaraı ózgerip otyrady.
Semeı, Shymkent, Kókshetaý men Aqtóbede ortasha baǵa 20 myń teńge. Alaıda baǵa aıyrmashylyǵy bul qalalarda da baıqaldy. Shymkentte usynys 10 myń teńgeden bastalyp, 30 myń teńgege deıin jetedi. Baǵaǵa stsenarıı, keıipkerlerdiń sany men qyzmet kórsetý uzaqtyǵy áser etedi. Semeıde ortasha baǵa 10-30 myń teńge aralyǵynda. Aqtóbe qalasynda Aıaz Ata men Aqshaqardy 20 myń teńgege shaqyrýǵa bolady. Al bir top bala bolsa 25-30 mınýttyq baǵdarlamaǵa 40 myń teńge alady. 31 jeltoqsannan keıin baǵa túsedi. Kókshetaý qalasynda úıde quttyqtaý baǵasy 15 myń teńgeden bastalyp, Jańa jyl túni 17 myń jáne odan joǵary bolady. Ortasha baǵa shamamen 20 myń teńge.
Pavlodarda 15-20 mınýttyq quttyqtaý baǵdarlamasynyń qyzmet quny 10-28 myń teńge aralyǵynda. Eger qalasańyz Aıaz Atanyń ózin ǵana shaqyryp, balańyzǵa syılyq tabystaı alasyz. Bul qyzmet quny 5 myń teńgeden bastalady. Eger baǵa joǵary bolsa, keıipkerlerdiń kıim úlgisi óte ádemi jáne baǵdarlamasy qyzyqty degen sóz. Al 30 jáne 31 jeltoqsan kúnderi aralyǵynda baǵa óse túsedi.
Oral, Qostanaı, Aqtaý men Qyzylordada baǵa orta eseppen 17,5 myń teńge bolyp tur. Degenmen ár qalanyń óz ereksheligi de bar. Máselen Qyzylordada Aıaz Ata men Aqshaqar úıge kelip quttyqtasa, aqysy 15-20 myń teńge. Oralda baǵa osy shamalas, tek Jańa jyl túni 25-30 myń teńge bolady. Aqtaý qalasynda qysqa ǵana quttyqtaý qyzmetin 7 myń teńgege de tabasyz. Eger tolyqqandy quttyqtaý qajet bolsa, 10-25 myń teńge kerek. Qostanaı qalasynda 10-15 mınýttyq quttyqtaý 6-7 myń teńge, al 30 mınýttyq oıyn baǵdarlamasy 12-16 myń teńge. Munda 15-20 myń teńgeniń de quttyqtaý qyzmeti bar.
Elimizde qoljetimdi usynysty Petropavl qalasynan tabýǵa bolady. Munda Aıaz Ata men Aqshaqardy úıge shaqyrsa, 10 500 — 14 500 teńge suraıdy. Al Jańa jyl túni 12,5 — 18,5 myń teńge aralyǵynda bolady. Jańa jyl qarsańynda bul qyzmettiń quny 10 myń teńge bolyp tur.
Buǵan deıin Qazaqstan qalalaryndaǵy korporatıv keshteriniń baǵasy men shyrsha quny týraly jazyldy.