Qazaqstanda aıaq kıimdi mindetti tsıfrlyq tańbalaý tártibi engizilýi múmkin
Bul degenimiz, barlyq aıaq kıim óndirýshiler men ımporttaýshylar óz taýarlaryn arnaıy eki ólshemdi Data Matrix kodymen tańbalaýy kerek. Barlyq normatıvtik-quqyqtyq aktiler bekitilgennen keıin, álemniń basqa elderinen, onyń ishinde EAEO-dan tsıfrlyq tańbalaýsyz taýar Qazaqstan shekarasynan óte almaıdy. Tańbalanbaǵan aıaq kıimniń qaldyqtaryn jyl boıyna satýǵa bolady.
Jańa engizilim Qazaqstannyń aıaq kıim naryǵynyń barlyq qatysýshylaryna – óndirýshilerge, ımporttaýshylarǵa jáne bólshek saýda dúkenderine qatysty bolady. Atap aıtqanda, aıaq kıim aınalymyna qatysýshylar taýarlardy tańbalaý men olardyń qadaǵalanýynyń aqparattyq júıesinde (TTQAJ) tirkelýge, sondaı-aq óz taýarlaryn Ulttyq katalogta tirkeýge tıis bolady. Tańbalaý kodtary avtomatty túrde TTQAJ-da jasalady. Sodan keıin olardy Data Matrix-ke túrlendirýge jáne basyp shyǵarý úshin júkteýge bolady.
«Qazir Qazaqstanda aıaq kıimdi mindetti tsıfrlyq tańbalaýdy engizý úshin normatıvtik-quqyqtyq bazany daıyndaý protsedýralary ótip jatyr. Biraq biz ımporttaýshylarǵa, óndirýshilerge jáne bólshek satýshylarǵa naryqta jumys isteýdiń jańa erejelerine qazir daıyndalýǵa keńes beremiz. Bıznes tsıfrlyq tańbalaý protsesin neǵurlym erterek bastasa, barlyq kezeńderdi zertteýge onyń kóp ýaqyty bolady», - dedi Tsıfrlyq ekonomıkany damytý ortalyǵynyń bas dırektory Bıkesh Qurmanǵalıeva.
Importtaýshylar taýarǵa Data Matrix tsıfrlyq tańbalaý kodyn taýar memlekettik kedendik rásimderden ótkenge deıin tańbalanýy qajet. Ónimdi basqa eldegi óndiriste nemese Qazaqstan Respýblıkasynyń aýmaǵyndaǵy keden qoımasynda tańbalaýǵa bolady.
Data Matrix kody tikeleı aıaq kıimge, sondaı-aq taýarlyq japsyrmaǵa nemese tutynýshy qaptamasyna engizilýi múmkin.
Tsıfrlyq tańbalaý naryqty sapasyz jáne Qazaqstan aýmaǵyna zańsyz ákelingen ónimderden tazartýǵa kómektesedi, sondaı-aq otandyq óndirýshilerdi damytýǵa serpin beredi. Tutynýshy da óz paıdasyn alady. Birinshiden, jańa tsıfrlyq belgi satyp alýshy úshin ónimniń zańdylyǵy týraly belgi bolady. Ekinshiden, tutynýshy Naqty Onim arnaıy mobıldi qosymshasy arqyly Data Matrix kodyn skanerlep, taýar týraly tolyq aqparat ala alady.
Esterińizge sala keteıik, Qazaqstan Respýblıkasynda temeki ónimderin mindetti tsıfrlyq tańbalaý 2020 jylǵy 1 qazannan bastap engizildi. 2022 jyly farmatsevtıkalyq preparattardy, alkogol ónimderin jáne jeńil ónerkásip taýarlaryn mindetti tsıfrlyq tańbalaýdy iske qosý josparlanyp otyr.
