Qazaqstanda avtojoldardaǵy 12 medıtsınalyq-qutqarý pýnkti jumys isteıdi - Densaýlyq saqtaý mınıstrligi
ASTANA. 27 qyrkúıek. QazAqparat - Qazaqstanda respýblıkalyq joldardyń apatty jerlerindegi jol-kólik oqıǵalary nátıjesinde jaraqattanýshylyqty azaıtý úshin 12 trassadaǵy medıtsınalyq-qutqarý pýnkti quryldy, dep habarlady Densaýlyq saqtaý mınıstrliginiń baspasóz qyzmeti.
«Trassadaǵy 12 medıtsınalyq-qutqarý pýnkti ashyldy. Sonymen qatar, 4 aýdanaralyq travmatologııalyq bólim ashylady. Olar jalpy halyq sany 80-100 myń adamnan kem bolmaıtyn jaqyn jerdegi 2-3 aýdanǵa jol-kólik oqıǵasynan zardap shekenderdi tasymaldaýdyń qysqa jolymen qyzmet kórsetedi», - dep habarlanǵan málimdemede. Rrimeminister.kz saıtynyń jazýynsha, sanıtarlyq avıatsııanyń qurylǵan Respýblıkalyq úılestirý ortalyǵy 2 myńǵa jýyq ushýdy júzege asyrǵan, sondaı-aq jedel járdem qyzmetin jetildirý baǵytynda reanımobılder satyp alynýda, jer-jerlerde GPS-navıgatsııa júıesi engizilýde. Kadrlarmen qamtamasyz etý máselesin sheshý maqsatynda jedel medıtsınalyq kómek kórsetý ustanymdaryn 200-den astam medıtsınalyq qyzmetker oqydy, olardyń 150-ge jýyǵy - dáriger jáne 80-i - orta medıtsınalyq qyzmetker. Esterińizge sala keteıik, trassadaǵy medıtsınalyq-qutqarý pýnktterin uıymdastyrý QR Prezıdenti N. Nazarbaevtyń jyl saıynǵy Qazaqstan halqyna Joldaýynda berilgen tapsyrmalardy oryndaý barysynda densaýlyq saqtaýdy damytýdyń 2011-2015 jyldarǵa arnalǵan «Salamatty Qazaqstan» Memlekettik baǵdarlamasynda kórsetilgen.
