Qazaqstanda avtojoldar salasyndaǵy normatıvti — tehnıkalyq qujattar jańartylyp jatyr
ASTANA. KAZINFORM — Qazaqstanda jol salasyn retteıtin normatıvtik baza túbegeıli jańartylyp jatyr. Bul protsess endi tek jospar deńgeıinde emes naqty iske asyrý kezeńine ótti, dep habarlaıd QR Kólik mınıstrliginiń baspasóz qyzmeti.
Jańartý jumystary 2024–2029 jyldarǵa arnalǵan avtojol salasynyń normatıvtik bazasyn reformalaý jónindegi Jol kartasy aıasynda júzege asyrylyp, avtomobıl joldarynyń senimdiligine, qaýipsizdigine jáne tolyq ómirlik tsıkline baǵyttalǵan zamanaýı retteý júıesin qalyptastyrýǵa negizdelgen.
Reforma QR Kólik mınıstrliginiń Avtomobıl joldary komıtetiniń tapsyrmasymen «QazjorǴZI» AQ tarapynan júzege asyrylyp jatyr.
2023 jyldan beri júrgizilgen taldaý barysynda 1200-den astam normatıvtik qujat zerttelip, olardyń edáýir bóligi qazirgi talaptarǵa saı kelmeıtini anyqtaldy. Sonyń nátıjesinde keıbiri qaıta qaralyp, birqatary múlde joıylmaq. Qazirdiń ózinde 125 eskirgen qujat kúshin joıdy.
Jańa standarttar tek qaǵaz júzinde jazylmaıdy, olar ǵylymı zertteýler men halyqaralyq tájirıbege súıenip ázirlenip jatyr. Negizgi ózgeris joldy tek salý emes, ony jobalaýdan bastap kútip-ustaý men jóndeýge deıin tolyq tsıkl retinde qarastyrý.
Qazirdiń ózinde 2026 jylǵa arnalǵan jumystar aıasynda 5 ulttyq standart pen 9 salalyq qujat daıyndalyp jatyr. Olar jol qurylysyna jańa materıaldardy engizý, jol jamylǵylaryn kútip-ustaý, kópirlerdi damytý jáne ekologııalyq talaptardy kúsheıtý baǵyttaryn qamtıdy.
Reforma jol salasynyń jumys isteý qaǵıdalaryn ózgertedi. Endi jol sapasy tek qurylys kezinde emes, onyń qansha ýaqyt boıy qaýipsiz ári senimdi qyzmet etetini arqyly baǵalanady.
Osyǵan deıin Astanadaǵy N.Tilendıev dańǵylynyń bir bóligi 7 kúnge jabylatyny týraly jazdyq.
