Qazaqstanda avtojol salasyn reformalaıtyn jumys toby quryldy: usynystar 1 jeltoqsanǵa deıin ázirlenedi
ASTANA. KAZINFORM — Qazaqstanda avtojol salasyn reformalaý úshin úkimettik jumys toby quryldy. Ol jol qurylysynyń sapasyn baǵalaý tásilderin, standarttar men qurylys normalaryn qaıta qarastyryp, salany jańǵyrtý jóninde 1 jeltoqsanǵa deıin usynystar ázirleıdi. Bul týraly Úkimet málim etti.
Qazaqstan Respýblıkasynyń Premer-mınıstri Oljas Bektenovtiń ókimimen Memleket basshysynyń Qazaqstan Halyq Keńesiniń birinshi sessııasynda bergen tapsyrmalaryn júzege asyrý aıasynda avtojol salasyn reformalaý jónindegi jumys toby quryldy.
Jumys tobyna jol qurylysynyń qoldanystaǵy júıesi men onyń sapasyn baǵalaý tásilderin qaıta qaraý, standarttar men qurylys normalaryn jańartý mindeti júkteldi. Salany basqarýdyń jańa tetigi, onyń ishinde tsıfrlyq sheshimderdi de eskere otyryp, jol ınfraqurylymyn jaqsartýǵa, memlekettik qarajatty paıdalanýdyń tıimdiligi men ashyqtyǵyn arttyrýǵa baǵyttalady.
Premer-mınıstrdiń birinshi orynbasary basqaratyn jumys tobyna kólik, ónerkásip jáne qurylys, qarjy, ishki ister, ekologııa jáne tabıǵı resýrstar, energetıka mınıstrlikteriniń basshylyǵy, Bas kólik prokýrorynyń orynbasary, «QazMunaıGaz» UK» AQ, «QazAvtoJol» UK» AQ, «Jol aktıvteri sapasynyń ulttyq ortalyǵy» RMK, «QazjolǴZI» AQ, «Memsaraptama» RMK, «QazQSǴZI» AQ ókilderi, sondaı-aq sala sarapshylary men Quryltaı depýtattary kirdi.
Premer-mınıstr osy jyldyń 1 jeltoqsanyna deıin avtojol salasyn túbegeıli reformalaý boıynsha, onyń ishinde zańnamalyq sharalardy qamtıtyn usynystar ázirleýdi tapsyrdy.
