Qazaqstanda avtovokzaldarǵa qoıylatyn talaptar ózgerdi
ASTANA. KAZINFORM — Qazaqstanda avtovokzaldar men avtostantsııalarǵa jáne jolaýshylar tasymaly boıynsha talaptar belgilendi.
QR SIM Tehnıkalyq retteý jáne metrologııa komıteti Ulttyq standarttardy bekitti. Atap aıtqanda:
— QR ST 2271-2020 «Saparjaılardyń, avtostantsııalardyń jáne jolaýshylarǵa qyzmet kórsetý pýnktteriniń qyzmetteri»;
— QR ST 2272-2020 «Taksımen tasymaldaý boıynsha avtokólik qyzmetteri. Jalpy talaptar»;
— QR ST 2273-2020 «Turaqty jáne turaqty emes jolaýshy tasymaldary boıynsha avtokólik qyzmetteri. Jalpy talaptar»;
Standarttardy QR Kólik mınıstrliginiń bastamasymen «Qazaqstan standarttaý jáne metrologııa ınstıtýty» ázirledi.
Sonymen QR ST 2271-2024 «Saparjaılardyń, avtostantsııalardyń jáne jolaýshylarǵa qyzmet kórsetý pýnktteriniń qyzmetteri» ulttyq standartyna sáıkes:
— avtovokzaldar men avtostantsııalar avtomobıl tasymaldaýshylarymen, onyń ishinde avtotasymaldaýshylar Palatasynyń múshelerimen shart bolǵan kezde avtobýstardy reıs aldyndaǵy tehnıkalyq tekserýdi uıymdastyrýǵa tıis.
— avtovokzaldarda avtobýs júrgizýshileri ekıpajdarynyń uzaq (túngi) demalysyn uıymdastyrýǵa arnalǵan úı-jaılar bolýy tıis jáne t. b.
Al QR ST 2272-2024 jańa standartqa sáıkes «Taksımen tasymaldaý boıynsha avtokólik qyzmetteri. Jalpy talaptar» avtomobıl tasymaldaýshylar Palatasynyń erejeleri men standarttar talaptaryna sáıkes jabdyqtalǵan jeńil serııaly avtomobıldermen júzege asyrylady. Sondaı-aq, múgedektigi bar adamdar úshin taksı tasymaldarynyń qoljetimdiligi, onyń ishinde múgedektigi bar adamdardy tasymaldaýǵa arnalǵan arnaıy túrlendirilgen avtomobılder, qajetti ahýaldyq kómek kórsetý, bagajdy tıeý jáne túsirý, sonymen qatar múgedektigi bar adamdardyń tynys-tirshiligin jáne júrip-turýyn qamtamasyz etýge arnalǵan jabdyqtar jáne basqa da jaǵdaılar kórsetilgen.
Budan bólek, QR ST 2273-2024 «Turaqty jáne turaqty emes jolaýshy tasymaldary boıynsha avtokólik qyzmetteri. Jalpy talaptar» tasymaldaýshyǵa, sondaı-aq kólik quralyn daıyndaýshynyń tehnıkalyq qujattamasynyń talaptaryna, «Dońǵalaqty kólik quraldarynyń qaýipsizdigi týraly» tehnıkalyq reglamentine jáne QR ST 41.36, QR ST 41.52 ulttyq standarttaryna sáıkes keletin avtobýstarǵa qoıylatyn talaptardy belgileıdi. Sondaı-aq standarttar avtobýstardy shuǵyl jedel qyzmetterdi shaqyrý qurylǵysymen jabdyqtaýdy kózdeıdi.
— Bul ózgerister Qazaqstandaǵy jol qozǵalysynyń barlyq qatysýshylary úshin joǵary deńgeıdegi jaılylyq pen qaýipsizdikti qalyptastyrýǵa baǵyttalǵan, — dep túsindirdi vedomstvo.
Eske salsaq, Qyzylordada zamanaýı úlgidegi jańa avtovokzal paıdalanýǵa berilgeni habarlandy.