Qazaqstanda avtoturaq aqysyn tóleýden jaltarǵany úshin aıyppul alynyp tastalmaq
ASTANA. KAZINFORM – Qazaqstanda kólik turaǵyna tólemnen jaltarǵandarǵa aıyppuldy alyp tastap, densaýlyqqa zııan kelmegen jol-kólik oqıǵasy úshin júrgizýshi kýáliginen aıyrý jazasyn qoldanbaý josparlanyp otyr. Bul normalar búgin Májilistiń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy talqylaý kezinde málim boldy.
«Máselen, zań jobasynda densaýlyqqa zııan keltirmegen jol-kólik oqıǵasynda júrgizýshi kýáliginen aıyrýdy qoldanbaý usynylǵan. Avtoturaq aqysyn tóleýden jaltarý úshin jaýapkershilik alynyp tastalady, óıtkeni bul qyzmetter azamattyq-quqyqtyq sıpatta», - dedi Májilis depýtaty Sergeı Ponamarev.
Onyń aıtýynsha, jumys tobynyń quramyndaǵy depýtattar ákimshilik zańnamany odan ári jetildirýge jáne ony basqa zańnamalyq aktilerge sáıkestendirýge baǵyttalǵan birqatar túzetý engizdi.
Bul turǵyda, qoǵamdyq jumystarǵa tartý tetigin jetildirý, jazanyń osy túriniń oryndalýyn qadaǵalaý organdarynyń jaýapkershiligin qaıta qaraý usynyldy.
Budan buryn habarlanǵandaı, Májilis ákimshilik kodekske ózgerister men tolyqtyrýlar engizetin zań jobasyn birinshi oqylymda maquldady.
