Qazaqstanda avtorlyq quqyqty buzýǵa qatysty 98 qylmystyq is qozǵaldy

Keltirilgen shyǵyn kólemi 554,7 mln. teńgege baǵalanýda. Bul týraly QR Qarjy mınıstrligi Memlekettik kirister komıteti Kedendik baqylaý basqarmasy bastyǵynyń orynbasary Eraly Nuralıev málim etti, dep habarlaıdy QazAqparat.

«9 aıdyń qorytyndysynda ekonomıkalyq tergeýler qyzmetiniń óndirisinde 168 qylmystyq is boldy. Onyń ishinde 98 qylmystyq is QR QK «Avtorlyq jáne aralas quqyqty buzý» 198-baby, 70 qylmystyq is «Taýar belgilerin zańsyz paıdalaný» 222-baby boıynsha qozǵalǵan. Keltirilgen shyǵyn 554,7 mln. teńge somasyna baǵalanýda. Onyń 332,1 mln. teńgesi óndirildi», - dedi Nuralıev.

Onyń aıtýynsha, qazirgi ýaqytta zııatkerlik menshik nysandary quqyǵyn qorǵaý sharalary quqyq ıelenýshiniń ótinishi boıynsha zııatkerlik menshik nysandarynyń kedendik tizilimi negizinde qabyldanady.

«1 qazandaǵy jaǵdaı boıynsha Zııatkerlik menshik nysandarynyń kedendik tizilimine 3628 taýar ataýy boıynsha 418 taýar belgisi qosylǵan. 2016 jyldyń 9 aıynda jalpy somasy 8,5 mln. AQSh dollarlyq zııatkerlik menshik quqyǵynyń buzylý belgisi bar taýarlardyń  371 deklaratsııasy boıynsha taýarlardy shyǵarý toqtatyldy», - dedi ol.