Avtorlyq quqyq salasynda ne ózgerýi múmkin
ASTANA. KAZINFORM — Májiliste zııatkerlik menshik máseleleri boıynsha zańnamaǵa engiziletin túzetýler talqylanyp jatyr. Bul ózgertýler avtorlyq quqyq salasyn qalaı jaqsartady? Agenttik tilshisiniń saýalyna Ádilet mınıstrligi túsinik berdi.

«Qazaqstan Respýblıkasynyń keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» zań jobasynyń negizgi maqsaty:
— avtorlardyń jáne basqa avtorlyq quqyq ıelenýshilerdiń quqyqtaryn naqtylaý (retranslıatsııa boıynsha);
— kórý qabileti buzylǵan adamdardyń týyndylarǵa, onyń ishinde olardy taratýǵa jáne kópshilik aldynda oryndaýǵa qol jetimdibolýyn jaqsartý;
— taýar tańbalaryn jedeldetip tirkeýdi engizý (7 aıdan 3 aıǵa deıin);
— taýar tańbasyn tirkeýge qarsylyq bildirý merzimin ulǵaıtý (1 aıdan 2 aıǵa deıin);
— taýar belgilerin tirkeýden bas tartý negizderin naqtylaý;
— formaldy saraptama satysynda ónertabysqa patent berýden bas tartý múmkindigi.
Sonymen qatar «Avtorlyq quqyq jáne sabaqtas quqyqtar týraly» Zańdy halyqaralyq standarttarǵa sáıkestendirý maqsatynda habar taratý jáne kabeldik habar taratý uıymdarynyń aıryqsha quqyqtary boıynsha ózgerister qarastyrylyp jatyr.
Munymen qosa, kórý qabileti buzylǵan adamdar úshin jasalatyn múmkindik aıasy keńeıtilip jatyr. Máselen, Braıl qarpimen nemese basqa arnaıy quraldar arqyly tıisti formattar qamtylady.
Daýly túzetýler
Eske salaıyq, byltyr Ádilet mınıstrligi avtorlyq quqyqty ujymdyq basqarý fýnktsııalaryn memlekettik monopolııaǵa berýdi usynǵan bolatyn. Alaıda qazaqstandyq avtorlar men sarapshylar bul ózgeristerge qarsy boldy. Olardyń paıymynsha, osy túzetýler monopolııaǵa alyp keledi jáne Konstıtýtsııa men halyqaralyq normalarǵa qaıshy. Ádilet mınıstrligi bul usynys endi talqylanbaıtynyn rastady.
Eske salsaq, bıyl aqpan aıynda avtorlyq quqyq máselesine memlekettik monopolııa engizý usynysy nege qabyldanbaǵanyn jazǵan edik.
Taıaýda Mádenıet jáne aqparat mınıstriniń orynbasary Evgenıı Kochetov Úkimet otyrysynan keıin ótken baspasóz máslıhatynda toıhanalar men karaoke-barlardyń avtorlyq quqyq tólemderin tsıfrlandyrý týraly pikir bildirdi.