Qazaqstanda avtorlarǵa arnalǵan mobıldi qosymsha iske qosylady
ASTANA. KAZINFORM — Qazaqstanda avtorlar men quqyq ıelenýshilerge óz týyndylarynyń qashan jáne qansha ret paıdalanylǵanyn, sondaı-aq qansha syıaqy tıesili ekenin baqylaýǵa múmkindik beretin mobıldi qosymsha iske qosylady. Bul týraly Ortalyq kommýnıkatsııalar qyzmetinde ótken brıfıngte QR Ádilet vıtse-mınıstri Botagóz Jaqselekova aıtty.
Vıtse-mınıstrdiń sózinshe, mobıldi qosymsha zııatkerlik menshik salasyndaǵy Biryńǵaı tsıfrlyq platforma aıasynda ázirlenip jatyr.
— Mobıldi qosymsha arqyly avtor men quqyq ıelenýshi óz týyndysynyń qaıda, qashan jáne qansha ret paıdalanylǵanyn, odan qansha qarajat jınalǵanyn jáne ózine qansha syıaqy tıesili ekenin kóre alady, — dedi Botagóz Jaqselekova.
Onyń aıtýynsha, avtorlar qajetti málimetti kez kelgen ýaqytta uıaly telefon arqyly qaraı alady.
Biryńǵaı tsıfrlyq platforma avtorlar men quqyq ıelenýshilerdi, olardyń quqyqtaryn basqaratyn uıymdar men týyndylardy paıdalanýshylardy bir ortaǵa biriktiredi. Platforma arqyly shart jasasýǵa, týyndylardyń paıdalanylýyn esepke alýǵa, esep berýge, sondaı-aq avtorlarǵa tıesili syıaqyny bólip, tóleýge bolady.
Buǵan deıin brıfıng barysynda vıtse-mınıstr avtorlyq quqyq salasyndaǵy Biryńǵaı tsıfrlyq platforma qalaı jumys isteıtinin aıtqan edi.
