Qazaqstanda avtooryndyqtardy qoldanbaǵan júrgizýshilerge aıyppul salyna bastady
ASTANA. QazAqparat - Astanada dúısenbiden bastap balalardy tasý kezinde avtooryndyq qoldanbaǵan 20 júrgizýshige aıyppul salyndy. Bul týraly Astana qalalyq ІІD-inde ótken brıfıngte Ákimshilik polıtsııa basqarmasy basshysynyń orynbasary Sabyr Júsipbekov aıtty.
"Biz Zań kúshine engen alǵashqy 10 kúnde júrgizýshilerge eskertý jasap, aldyn alý sharalarymen aınalystyq. Oqý jylynyń úshinshi toqsanynyń bastalýyn kúttik. Qysqy demalys bolyp jatqandyqtan, ata-analarǵa múmkindik berdik. Endi osy dúısenbiden bastap atalǵan sanktsııalardy qoldana bastadyq", - dep atap ótti ol.
S.Júsipbekovtiń aıtýynsha, qazir polıtsııa qyzmetkeri júrgizýshilerge eskertý jasamaıdy.
"Osy dúısenbiden bastap 20 júrgizýshi balalaryn arnaıy avtooryndyqsyz alyp júrgeni úshin jaýapkershilikke tartyldy. Al qalada jaryǵyn jaqpaı júrgeni úshin 724 júrgizýshige aıyppul salyndy", - dep túsindirdi ІІD ókili.
