Qazaqstanda avtonesıe kólemi rekordtyq deńgeıge jetti

ALMATY. KAZINFORM – 2025 jyldyń 1 qańtarynda avtonesıe portfeli 3,6 trln teńgege jetti. Bir jyl ishinde ol 44,8 paıyzǵa nemese 1 119,3 mlrd teńgege ósti.

Birinshi nesıelik bıýro bas dırektory Rýslan Omarov avtonesıe nesıeleýdiń eń qarqyndy damyp kele jatqan salasy ekenin atap ótti.

Onyń málimetinshe, jasalǵan avtonesıe boıynsha kelisimsharttardyń jalpy sany 591 myńnan asty. Al boryshkerler sany 559,2 myń shamasynda. Eki kórsetkish te ótken jylmen salystyrǵanda artqanyn kórsetti.

— Biz avtonesıe boıynsha rekordty ekinshi jyl qatarynan kórip otyrmyz. 2023 jyly ósim 64 paıyz bolsa, 2024 jyly - 44%. ıAǵnı, negizgi portfel turaqty dınamıkasyn kórsetýdi jalǵastyryp jatyr, — dedi ol.

Byltyr berilgen avtonesıe kólemi - 1,8 trln teńge. Bul 2023 jylmen salystyrǵanda 13,2%-ǵa artyq. Nesıe alýshylardyń sany 214 myń adamǵa jetip, 10,2%-ǵa ósti, al jasalǵan sharttar - 228,4 myń. Aldyńǵy jylmen salystyrǵanda 5,7%-ǵa kóp.

Avtonesıe sharttary boıynsha ortasha qaryz 8 mln teńge shamasynda. Bul ótken jylmen salystyrǵanda 7,1%-ǵa nemese 529,5 myń teńgege artyq. Ortasha qaryz 10,8%-ǵa nemese 742,3 myń teńgege ósip, 7,6 mln teńgege jetti.

— Kóliktiń ortasha quny - 10 mln teńge, — dedi ol.

Sondaı-aq spıker jeltoqsan aıynda 25 600 kólik satylǵanyn, al berilgen nesıeler sany 26,7 myń bolǵanyn atap ótti.

Berilgen avtonesıeniń jalpy somasy ótken jylmen salystyrǵanda 13,2%-ǵa ósse, avtokólikter 6,4%-ǵa qymbattady. Nesıeniń eń kóp kólemin ekinshi deńgeıli bankter bergen – 3 039,8 mlrd teńge.

Buǵan deıin eldegi kólikterdiń jartysyna jýyǵynyń shyqqanyna 20 jyldan asyp ketkeni týraly jazǵan edik. 

Sondaı-aq Ónerkásip jáne qurylys mınıstri baspasóz máslıhatynda 4 paıyzdyq avtonesıe nege kelmeske ketkenin aıtqan bolatyn.