Qazaqstanda avtomobılderdiń «kóleńkeli» ımportyna baqylaý kúsheıtiledi

ASTANA. KAZINFORM – Qazaqstannyń avtokólik odaǵynyń prezıdenti Anar Maqasheva Úkimet otyrysynda mashına jasaý salasyndaǵy qazirgi ahýal týraly habardar etti. 

«Máselen, jalpy mashına jasaý salasyndaǵy avtomobıl jasaý úlesi 39,4%-dy qurady, al esepti kezeńde jańa mashınalardy satýdyń jalpy kólemindegi otandyq avtomobılderdiń úlesi 63%-ǵa jetti», - dedi ol.

2024 jyldyń qorytyndysy boıynsha Qazaqstanda 130 myńnan astam jeńil avtomobılder men kommertsııalyq tehnıka shyǵarylady dep kútilip otyr. 

Avtoóndirýshilerdiń aldynda turǵan negizgi problemalardyń qatarynda logıstıka, sondaı-aq Qazaqstanǵa «qylmystyq» ótkeni bar jáne tehnıkalyq reglamentke sáıkes kelmeıtin avtomobılderdi ákelý isi turǵany atap ótildi. Osyǵan baılanysty Premer-mınıstr memlekettik organǵa kólikti «kóleńkeli» jetkizý isimen aınalysýdy tapsyrdy. 

«Másele óte mańyzdy. Ol otandyq avtoóndirýshiler úshin josyqsyz básekelestik týǵyzady. Bul ásirese júk kóliginde baıqalady. Keden organdary, standarttaý komıteti bul máselemen baıypty aınalysýǵa tıis. Sondaı-aq polıtsııa da qosylýy kerek. Men avtomobıl zaýyttarynyń birinde óndirýshilermen kezdestim, olar: «biz óndiremiz, biraq munda Eýro2 retinde keletin tehnıkamen básekege túse almaımyz, olarda Eýro5 qujattary qandaı da bir keremet jolmen paıda bolady» dep aıtty. Munda qatań tártip ornatý qajet», - dep atap ótti Oljas Bektenov.