Qazaqstanda avtomobıl joldarynyń 11 myń shaqyrymnan astamy jóndeledi
ASTANA. KAZINFORM - 2026 jyly Qazaqstanda avtomobıl joldarynyń 11 myń shaqyrymnan astamy jol jumystarynyń barlyq túrlerimen qamtylmaq. Bul týraly Kólik mınıstrliginiń alqa otyrysynda vıtse-mınıstr Maqsat Qalıaqparov málimdedi.
Jol-qurylys maýsymy aıasynda respýblıkalyq mańyzy bar joldardyń 8,9 myń shaqyrymy jáne jergilikti jol jelisiniń 2,3 myń shaqyrymy qurylys, rekonstrýktsııa jáne jóndeý jumystarymen qamtylady. Sonyń ishinde 3,5 myń shaqyrym joldaǵy jańa qurylys jáne qaıta jańartý nysandaryn aıaqtaý josparlanyp otyr. Budan bólek, respýblıkalyq mańyzy bar joldardy ortasha jóndeý baǵdarlamasy aıasynda bıyl shamamen 2 myń shaqyrym joldy aıaqtaý kózdelgen.
Shyǵys Qazaqstan oblysynda Osınov asýyndaǵy jumystardy aıaqtaý, Soltústik Qazaqstan oblysynda Petropavl – Qorǵan avtojolyn qaıta jańartý jolyn paıdalanýǵa berý josparlanyp otyr.
2026 jyldyń qorytyndysy boıynsha respýblıkalyq joldardyń 95 paıyzy, al jergilikti joldardyń 92 paıyzy normatıvtik standarttarǵa saı bolady dep josparlanyp otyr.
Vıtse-mınıstr qurylys jáne qaıta jańartý jobalaryna da jeke toqtaldy. 2026 jyly olardyń jalpy qamtý kólemi 3,4 myń shaqyrymdy quraıdy.
- Bıyl salany damytýdyń úsh jyldyq josparynda kózdelgen tranzıttik baǵyttardy jańǵyrtý boıynsha jańa jobalardy iske asyrý bastalady, — dedi Maksat Qalıaqparov.
Atap aıtqanda, Qyzylorda – Aqtóbe baǵyty boıynsha joldy tórt jolaqty etip keńeıte otyryp qaıta jańartý jumystary bastalady. Qaraǵandy – Jezqazǵan jobasy boıynsha tehnıkalyq-ekonomıkalyq negizdeme bekitilip, qurylys-montaj jumystary ekinshi jartyjyldyqta bastalmaq.
Uzyndyǵy 559 shaqyrym bolatyn Beıneý – Sekseýil jobasy tasymal qashyqtyǵyn 900 shaqyrymǵa qysqartyp, jol júrý ýaqytyn úsh táýlikke deıin azaıtýǵa múmkindik beredi.
Vıtse-mınıstrdiń aıtýynsha, joba boıynsha memlekettik saraptamanyń oń qorytyndysy alynǵan.
Uzyndyǵy 102 shaqyrym bolatyn Saryaǵash qalasynyń aınalma joly jobasy boıynsha otandyq kompanııalar arasynan merdiger uıymdar anyqtalǵan.
Aıta keteıik, ótken jyly elimizde 13 myń shaqyrymǵa jýyq jol jóndelgen.