Qazaqstanda avtomobıl joldaryn jóndeýdiń jańa tásili engizildi
ASTANA. KAZINFORM - Qazaqstanda avtomobıl joldaryn ortasha jóndeý boıynsha normatıvtik qujattarǵa ózgerister engizildi. Bul ózgerister bıýdjet qarajatyn paıdalaný tıimdiligin arttyrýǵa jáne zamanaýı jol tehnologııalaryn engizýge baǵyttalǵan.
Kólik mınıstrligi málimetinshe, ózgerister sýyq resaıklırleý tehnologııasyn keńinen qoldanýdy, sondaı-aq qozǵalys qarqyndylyǵy tómen joldarda balama jol konstrýktsııalaryn paıdalanýdy qarastyrady. Búginde jergilikti jol jelisiniń edáýir bóligi shaǵyn eldi mekenderge qyzmet kórsetedi. Mundaǵy qozǵalys qarqyndylyǵy táýligine 200 avtomobılden az.
Mundaı júktemelerde qymbat turatyn asfaltbeton jabynyn ornatý kóbine ekonomıkalyq turǵydan negizsiz bolyp sanalady. Salystyrý úshin, asfaltbeton jabynyn jasaý quny ótpeli tıptegi jabynnyń qunynan 1,5–3 ese artyq bolýy múmkin. Al jekelegen aýyldyq joldardaǵy naqty kólik júktemesi kúrdeli konstrýktsııalardy qoldanýdy talap etpeıdi.
Osyǵan baılanysty jańa normalar joldyń tehnıkalyq sanatyn ózgertpeı, qıyrshyqtas, shaǵyltas jabyndaryn, topyraq stabılızatorlarynyń tehnologııalaryn jáne jol jabynyń ózge de balamaly konstrýktsııalaryn qoldaný múmkindigin kózdeıdi. Sonymen qatar sýyq resaıklırleý tehnologııasyn qoldaný múmkindikteri keńeıtildi.
Eger buryn alynǵan materıal jol kıiminiń negizin jasaý úshin ǵana paıdalanylsa, endi ony jóndeý jumystarynyń keń aýqymynda paıdalaný múmkindigi normatıvtik túrde bekitildi.
Sýyq resaıklırleý qoldanystaǵy jol jabynynyń materıaldaryn 100% deıin qaıta paıdalanýǵa, jańa ınertti materıaldar men bıtým tutynýdy azaıtýǵa, sondaı-aq jobalaý sheshimderine baılanysty jóndeý jumystarynyń qunyn 20–40% tómendetýge múmkindik beredi. Jańalyq retinde topyraq joldardy qıyrshyqtas jáne shaǵyltas jabyndaryna aýystyrýdy, sondaı-aq stabılızatorlardy qoldana otyryp, jaqsartylǵan topyraqtardy paıdalanýdyń normatıvtik múmkindigi jasalǵanyn aıtýǵa bolady.
Bul bıýdjet qarajatyn utymdy paıdalana otyryp, aýyldyq eldi mekenderdiń jyl boıy kólik qoljetimdiligin qamtamasyz etýge múmkindik beredi. Buıryq alǵashqy resmı jarııalanǵan kúninen keıin on kúntizbelik kún ótken soń kúshine enedi.
Respýblıkalyq joldarda aýqymdy jóndeý júrip jatqanyn jazǵan edik.
