Qazaqstanda avtokólikti qaıta jabdyqtaý rásimi qatańdatyldy
ASTANA. KAZINFORM – QR Saýda jáne ıntegratsııa mınıstrligi Tehnıkalyq retteý jáne metrologııa komıteti QR ST 1418-2018 «Avtomotokólik quraldary. Konstrýktsııaǵa ózgerister engizý. Jalpy erejeler men tehnıkalyq talaptar» ulttyq standartyn qaıta qarady.
Bul standart – avtomobılder konstrýktsııasyna ózgeris engizýdiń tehnıkalyq aspektilerin retteıtin eldegi jalǵyz qujat.
Jańa ózgerister arasynda:
• 2024 jyly 1 mamyrdan bastap, akkredıttelgen synaq zerthanalary beretin qaýipsizdikti tekserý hattamasynyń biryńǵaı formasy engiziledi, onda kólik quralyn jáne onyń negizgi qaýipsizdik elementterin qaıta jabdyqtaý tásilin sáıkestendirýge qajetti negizgi oryndar mindetti túrde tolyqtyrylady.
• sondaı-aq, 2024 jyly 1 mamyrdan bastap, akkredıttelgen synaq zerthanalary qaıta jabdyqtalǵan kólik quraldarynyń qaýipsizdigin tekserý protsesin foto-jáne beınetirkeý mindetti bolady. Bul qaýipsizdikti tekserýdi rastaýǵa jáne osy protsedýrany nemquraıly júrgizetin josyqsyz zerthanalardy anyqtaýǵa múmkindik beredi.
• 2024 jylǵy 1 jeltoqsannan bastap, qaýipsizdikti tekserý hattamalaryn berý elektrondy formatta júzege asyrylady – biryńǵaı reestrdiń tehnıkalyq retteý aqparattyq júıesinde jarııalanady.
«Osy ýaqytqa deıin mundaı tekserýler úshin qaýipsizdik hattamasynyń naqty formasy, berilgen hattamalardyń biryńǵaı reestri bolǵan joq. Qandaı da bir problemalar týyndaǵan jaǵdaıda tekserý júrgizgen zerthanany anyqtaý qıynǵa soǵatyn, bul jaýapkershiliktiń joǵalýyna ákeledi. Bul ózgerister avtomobılderdi qaıta jabdyqtaý kezindegi rásimder men qaýipsizdiktiń ashyqtyǵyn arttyrýǵa yqpal etetinine senimdimin», - dep atap ótti komıtet tóraǵasy Qýanysh Elikbaev.
