Qazaqstanda avtokólik qozǵalysyn retteıtin tsıfrlyq platforma iske qosylady

ASTANA. KAZINFORM – Tsıfrlyq tásilder jáne jasandy ıntellektiniń kómegimen kedendik rásimderdi ońtaılandyrý kerek. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

- Úkimet temirjolmen qatar avtokólik tasymalyn damytýǵa qatysty iri jobalardy da júzege asyrý barysyn qatań baqylaýǵa alýy qajet. Men «Qaraǵandy – Jezqazǵan», «Ortalyq – Batys», «Aqtóbe – Ulǵaısyn» baǵytyndaǵy joldyń jáne Qyzylorda, Saryaǵash, Rýdnyı qalalarynyń syrtyndaǵy aınalma joldyń qurylysy týraly aıtyp otyrmyn. Avtokólik tasymalyn damytý týraly aıtqanda, eń aldymen, joldyń sapasy men qaýipsizdigine qatysty máseleler sheshimin tabýǵa tıis. Jańa jylǵa deıin jasandy ıntellektini paıdalana otyryp avtokólik qozǵalysyn retteıtin tsıfrlyq platformany iske qosý kerek, - dedi Qasym-Jomart Toqaev.

Sonymen qatar Prezıdent Qazaqstan júk jáne jolaýshylar tranzıtin barynsha tıimdi etý úshin shekaradaǵy ótkizý beketterin jappaı jańǵyrta bastaǵanyn eske saldy. Byltyr toǵyz beket iske qosyldy. Kelesi jyldyń sońyna deıin taǵy 33 beket tolyq jańǵyrtylady.

- Tsıfrlyq tásilder jáne jasandy ıntellektiniń kómegimen kedendik rásimderdi ońtaılandyrý kerek. Biraq baqylaý da álsirep ketpeýge tıis. Elimizdiń jáne kórshi memleketterdiń aqparattyq júıelerin ózara baılanystyrý kerek. Men Joldaýymda júk tasymalyn basqaratyn «Smart Cargo» tsıfrlyq platformasyn, sondaı-aq keden rásimderin jasaıtyn «Keden» júıesin engizýdi tapsyrdym. Qazir osy júıeler pılottyq rejımde jumys istep tur. Barlyq mekemeniń aqparattyq júıesin ózara kiriktirip, bul platformalardyń tolyq iske qosylýyn tezdetý kerek. Osylaısha, birtutas ıntellektýaldy kólik ekojúıesi qalyptasady, - dedi Memleket basshysy.

Budan buryn habarlanǵandaı, Qazaqstanda saqtandyrý jáne qor naryǵyn damytýdyń 2030 jylǵa deıingi baǵdarlamasy ázirlenedi.