Qazaqstanda avtokólikti tehnıkalyq baıqaýdan ótkizýge qatysty jaýapkershilik kúsheıtiledi
Bul týraly Nur-Sultan qalasynda aýa sapasyna arnalǵan konferentsııada Tájirıbeshil ekologtar qaýymdastyǵynyń tóraıymy Laýra Malıkova aıtty, dep habarlaıdy QazAqparat tilshisi.
«Ortalyq Azııadaǵy aýa sapasyna monıtorıng» atty konferentsııa barysyndaǵy baspasóz máslıhatynda Eýropa elderinde aýany qatty lastaýshy dızel otynymen júretin kólikterdi shekteý júrip jatqany jáne osyndaı qadamdardy elimizde engizý múmkindigi týraly suraldy.
«Aýanyń lastanýynda avtokólikterdiń de úlesi bar ekeni belgili. Dızel otynynyń benzınge qaraǵanda áldeqaıda las ekenin bilemiz. Germanııanyń keıbir qalalarynyń ortalyǵynda dızelmen júretin kólikterdi kirgizbeıdi. Endi bizde osyndaı saıasatty Almaty qalasynda qarastyryp jatyr, 2019 jylda talqylaýlar boldy. Atap aıtqanda, ár qalanyń ákimshiligi óziniń deńgeıinde kólikke qatysty óziniń saıasatyn bekitýi kerek. Osy oraıda aýanyń lastanýyn boldyrmaý úshin, halyqtyń densaýlyǵyna zııandy azaıtý maqsatynda dızelmen júretin avtokólikterge qatysty talaptardy qoısa bolady», - dedi Laýra Malıkova.
Sonymen qatar ol lastanýǵa jol bermeý úshin memlekettik deńgeıde munaı óńdeıtin zaýyttardyń jumysyn jaqsartý kerektigin aıtty.
«Ár otyn túriniń ózindik standarty bar, osy standarttarǵa kóshý úshin munaı óńdeý zaýyttarynda barynsha jańǵyrtý jumystaryn júrgizý mańyzdy», - dedi qaýymdastyq tóraıymy.
Budan bólek L. Malıkova avtokólikterdi tehnıkalyq baıqaýdan ótkizý máselesine toqtaldy.
«2011 jyldan beri tehnıkalyq baıqaý (tehosmotr) tetigi jeke sektorǵa berildi. Buǵan deıin ony memlekettik sektor júrgizse, 2011 jyldan bastap jekemenshik kompanııalar iske asyryp keledi. Qazirgi ýaqytta keıbir avkólik ıeleri tıisti qujatty aqshaǵa satyp alýy faktileriniń kezdesip jatqany ókinishti jaǵdaı. Sondyqtan osy máselelerdi jaýapty mınıstrlikke (Indýstrııa jáne ınfraqurylymdyq damý mınıstrligi) jetkizdik. Bıyl qazan aıynda tehnıkalyq baıqaýdy júrgizetin jekemenshik kompanııalardyń jaýapkershiligin arttyrý maqsatynda birqatar normalarǵa ózgeris engizý qarastyrylmaq», - dedi ol.
Osy oraıda Laýra Malıkova atalǵan kompanııalar tehnıkalyq baıqaýdan ótken kólikterge berilgen qujatqa, kóliktiń baıqaýdan laıyqty deńgeıde ótkenine jaýap berýi kerek ekenin atap ótti.
«ıAǵnı, messendjerler arqyly satatyn qujat bolmaýy kerek. Mamandar avtokólikti naqty qarap, testilik synaqtan ótkizip, sonyń nátıjesinde qujatty berýi mańyzdy. Eger teksermesten jalǵan qujat berse, soǵan sáıkes jaýapkershilik qarastyrylady», - dedi qaýymdastyq tóraıymy.