Qazaqstanda avtokólikter qymbattaýy múmkin - Avtobıznes qaýymdastyǵy
ASTANA. QazAqparat - Qazaqstanda avtokólikter qymbattaýy múmkin. Bul týraly búgin Qazaqstan mashına jasaýshylarynyń úshinshi forýmy barysynda tilshilerge bergen suhbatynda Qazaqstan avtobıznes qaýymdastyǵynyń tóraǵasy Andreı Lavrentev málim etti.
«Belgili bir deńgeıde avtokólik baǵalarynda ósim bolady. Alaıda, bizde baǵasy belgilengen deńgeıdegi kóliktiń sany aıtarlyqtaı eleýli kólemde. Ulttyq qazaqstandyq avtomobılder qunynyń ósimi turǵysynda aıtatyn bolsaq, baǵa teńge baǵamyna úılesimdi deńgeıde artpaıtyndyǵy anyq»,-dep toqtaldy ol.
Osy oraıda ol avtoónerkásipte teńgege bekitilgen lokalızatsııanyń (kólikterdiń tetikteriniń elimizde shyǵarylýy deńgeıi) úlesi bar ekenin, bul turǵyda osy lokalızatsııanyń kóleminde avtomobıl quny qymbattamaıtynyn atap ótti.
«Biz kompanııalardaǵy jaǵdaıdy baqylyp otyrmyz, monıtorıng júrgizýdemiz, sondaı-aq satyp alýshylardyń shaǵymdaryn nazardan shyǵarmaımyz»,-dedi A. Lavrentev.
Sonymen qatar ol otandyq kólikter keıbir avtosalondarda bir dollarǵa 270 teńge baǵamymen satylyp jatqandyǵyn joqqa shyǵardy.
«Keshe keıbir salondarda kólikter 270 teńge baǵamymen satylyp jatyr degen aqparat shyqty. Múmkin, bundaı baǵammen ımporttyq avtomobılder satylyp jatqan shyǵar, alaıda Qazaqstanda shyǵarylǵan mashınalar boıynsha bul aqparat naqtylanbady»,-dedi qaýymdastyq tóraǵasy.
