Qazaqstanda avtokólikke arnalǵan gazdyń ortasha baǵasy 8 paıyzǵa tómendeıdi

NUR-SULTAN. QazAqparat - Elde memlekettik retteýdi engizý arqyly tótenshe jaǵdaı kezinde avtokólikterge arnalǵan suıytylǵan gazdyń baǵasy turaqtandyrylady, bul óz kezeginde halyqtyń tutyný qorjynynyń qunyn tómendetedi, dep habarlaıdy QazAqparat QR Energetıka mınıstrliginiń baspasóz qyzmetine silteme jasap.

QR Prezıdenti janyndaǵy Tótenshe jaǵdaı rejımin qamtamasyz etý jónindegi memlekettik komıssııa otyrysynyń 2020 jylǵy 30 naýryzdaǵy № 8 hattamasynyń 8.2-tarmaǵyna sáıkes Energetıka mınıstrligine Ulttyq ekonomıka mınıstrligi jáne Ádilet mınıstrligimen birlesip, avtogaz quıý stansalarynda suıytylǵan munaı gazyn satýǵa arnalǵan ýaqytsha memlekettik baǵalyq retteýdi engizý jóninde sharalar qabyldaý tapsyryldy.

«Eger buryn janar-jaǵarmaı quıý stansalaryndaǵy gaz baǵasy naryq boıynsha rettelse, tótenshe jaǵdaı engizilgennen keıin Energetıka mınıstrligi oblys ákimdikterimen birlesip, barlyq 2 165 janarmaı quıý beketindegi eń tómengi jáne eń joǵary baǵany taldap, memleket retteıtin baǵalyq shekteýdi ornatty. Ár aımaqtaǵy baǵa logıstıkalyq shyǵyndarǵa, zaýytqa jaqyndyǵyna, janar-jaǵar maı stansalary pen tutynýshylar sanyna jáne t.b. baılanysty. Tutastaı alǵanda, Qazaqstanda suıytylǵan munaı gazynyń ortasha baǵasy 8% tómendeıdi», delingen habarlamada.

Budan basqa da sharalar qoldanyldy. Mysaly AMÓZ saqtaý parkinen bosatylatyn suıytylǵan munaı gazynyń baǵasy tonnasyna 62 myńnan 56 myń teńgege deıin tómendedi.

Osy buıryqty iske asyrý tótenshe jaǵdaı kezinde avtokólikke arnalǵan gazdyń baǵasyn memlekettik retteýdi engizý jolymen turaqtandyrýǵa múmkindik beredi, bul óz kezeginde halyqtyń tutyný qorjynyndaǵy shyǵynyn tómendetedi.

Birlesken buıryq 2020 jyldyń 1 sáýirinde ashyq normatıvtik quqyqtyq aktilerdiń ınternet portalynda ornalastyryldy. Qazirgi ýaqytta birlesken buıryq bekitildi jáne Ádilet mınıstrligine memlekettik tirkeýge jiberildi.

foto: hype.tech