Qazaqstanda avtokólik óndirisi jandana bastady - Oleg Alferov
ASTANA. QazAqparat - Qazaqstanda birinshi jartyjyldyqta 64,5 mlrd teńgeniń 8768 avtokóligi óndirildi. Jeńil avtokólikterdi, júk tehnıkasy men avtobýstardy qosa alǵanda ónim kóleminiń zattaı kórinisi ótken jyldyń kórsetkishinen 3,6 esege asyp túsken, dep habarlaıdy «QazAqparat» HAA tilshisi.
Bul týraly Ortalyq kommýnıkatsııalar qyzmetinde «Qazavtoóndiris» Qazaqstan avtomobıl salasy kásiporyndary odaǵynyń» basqarma tóraǵasy Oleg Alferov málim etti.
Basqarma tóraǵasynyń aıtýynsha, Qazaqstanda jeńil avtokólikter óndirisi 7779 birlikke jetip, 5,3 esege ulǵaıǵan. Avtobýs tehnıkasyn shyǵarý (313 birlik) 2017 jyldyń qańtar-maýsym aılarynyń qorytyndysy boıynsha bir jyl burynǵy kórsetkishten 4,4 esege artqan. Júk avtokólikteri óndirisi (487 birlik) 32,1 protsentke qysqarǵan.
Eseptik kezeńniń qorytyndylary boıynsha Qazaqstannan shetelge 831 avtokólik eksporttalǵan. Qazaqstandyq kólikter atap aıtqanda, Qytaı, Reseı, Belarýs jáne Tájikstan elderine satylǵan.
Jergilikti jerde qurastyrylǵan avtokólikter segmentinde basymdyqty «Azııa Avto» AQ ıelenedi. Atalǵan kásiporynǵa satylǵan jalpy avtokólikterdiń 5368-i (nemese 69 protsenti) tıesili. «SaryarqaAvtoÓnerkásip» JShS satqan avtokólik 1570 birlikti qurady. Odan ári qaraı otandyq avtoóndirýshiler ónimderi ótiminiń reıtınginde «KAMAZ-Injınırıng» AQ (222 nemese 3 protsent), «SemAZ» (206 nemese 3 protsent), «Agromash Holdıng» AQ (200 nemese 3 protsent) tur.
«Sońǵy 29 aıda kóptegen faktorlarǵa baılanysty qazaqstandyq avtokólikterdiń ótimi tómendep ketken bolatyn. Bıyl suranys qaıta artyp, otandyq kólik óndirýshiler 1 jartyjyldyqtyń qorytyndysy boıynsha retsessııa jaǵdaıynan shyqtyq. Qazaqstandyq avtokólik óndirýshi kásiporyndar qatarynan 6 aıy boıy kólik óndirýdi arttyryp keledi», - deıdi «Qazavtoóndiris» Qazaqstan avtomobıl salasy kásiporyndary odaǵynyń» basqarma tóraǵasy Oleg Alferov.
