Qazaqstanda avtokólik quny qymbattamaıdy
ASTANA. QazAqparat - Bul týraly búgin Ortalyq kommýnıkatsııalar qyzmetindegi brıfıngte «Qazavtobıznes» qaýymdastyǵynyń prezıdenti Andreı Lavrentev málimdedi.
Onyń aıtýynsha, jekelegen kompanııalar jazǵy maýsymdaǵy jeńildikterin shegerdi. Sonyń esebinen elimizdegi keıbir avtokólikter baǵasy 6 paıyzǵa ósti. Biraq bul atalǵan taýar teńgege qatysty jaǵdaıdan 30 paıyzǵa jáne odan joǵary kóterildi degen sóz emes. «Bizge memlekettik baǵdarlama arqyly nesıelendirýdi damytý úshin Úkimetten ekinshi deńgeıdegi bankter arqyly 15 mlrd. teńge bólindi. Barlyq baǵdarlamalar boıynsha, bul qarajat ıgerilýde, avtokólikterdiń quny eshqandaı ózgergen joq. Sondyqtan, bul jerde dúrligýge de eshbir sebep joq»,- dedi A. Lavrentev. Ol sondaı-aq, «Astana motor grýpp», «Allıýr grýpp» sııaqty keıbir kompanııalar avtokólik satýdy doǵardy» degen baspasózdegi aqparatty joqqa shyǵardy.
Qazaqstandyq avtokólik bıznesi qaýymdastyǵynyń basshysy búginge deıin elimizdiń aýmaǵynda turǵan avtokólikterdiń quny qymbattamaıtynyna sendirdi. Sebebi, avtokólik qurastyratyn kásiporyndardyń alańqaılarynda turǵan kólikterdiń báriniń baǵasy belgilengen. - Qaýymdastyq kún saıyn baǵanyń ósý-óspeýin boljaý úshin, barlyq óndirýshiler, dılerler men dıstrıbıýterlerdiń jumysyna monıtorıng júrgizedi. Kóptegen kompanııalar baǵamnyń valıýtalyq dálizin 1 dollarǵa - 200 teńge kóleminde belgiledi. Mysaly, «SemAZ», «Agromashholdıng», «SaryarqaAvtoÓnerkásip» sııaqty kompanııalar óz naqty baǵasyn belgiledi, jáne olardy kóterýge nıeti joq,- dep atap ótti qaýymdastyq basshysy.
«2015 jyldyń sońyna deıin Qazaqstanda qurastyrylatyn avtokólikter quny qymbattaı ma?» degen saýalǵa Andreı Lavrentev bylaı jaýap qaıyrdy: «Meniń oıymsha, baǵa ózgermeıdi. Sarapshy retinde aıtarym, teńgeniń baǵamy jyl sońyna deıin óspeıdi. Keıbir kompanııalar qandaı da bir modelderdiń baǵasyn ósirýi múmkin, biraq ol teńge baǵamy boıynsha 30-35 paıyzǵa qymbattamaıdy. Shetelderden ákelinetin jańa modelderdiń quny ári ketkende 5-6 paıyzǵa ósýi múmkin». Sonymen qatar, otandyq sarapshy Qazaqstan Eýrazııalyq ekonomıkalyq odaqqa múshe bolǵandyqtan, halyqaralyq avtokólik zaýyttary men dıstrıbıýtorlar úlken naryqtaǵy ortasha baǵany teńestiretinin túsindirdi. Ondaı jaǵdaıda Qazaqstanda satylatyn avtokólikter baǵasy Reseıde satylatyn avtokólikterden 5 paıyzǵa qymbat bolýy múmkin emes.
Ol «SemAZ», «Agromashholdıng», «SaryarqaAvtoÓnerkásip» kompanııalarynyń, atap aıtqanda, Ssang Yong, Peugeot, Geely, JAC sııaqty markaly avtokólikter quny qymbattamaıtynyn atap aıtty. Sondaı-aq, «Kamazınjınırıng» kompanııasy da rýbl baǵamymen jumys isteıtindikten, teńgeniń erkin aıyrbas baǵamyna kóshýi oǵan áser etpeıdi. Alaıda, Andreı Lavrentev «Azııa Avto» kompanııasyna qatysty eshqandaı túsinikteme bergen joq.
Ámirlan Álimjan
