Qazaqstanda avtobýstar men tehnıkalardy qurastyrýǵa 26 mlrd teńge bólinbek
ASTANA. QazAqparat - QR IDM-niń qoldaýymen Qazaqstandaǵy avtokólik quraldary parkiniń eskirgen tehnıkalaryn jańǵyrtýdyń keshendi jospary aıasynda memleket avtobýs, kombaın men traktorlardy jalǵa alǵan zańdy tulǵalardy jáne jeke kásipkerlerdi qarjylandyrý úshin aqsha bóletin boldy. Bul baǵdarlamanyń operatory retinde «QDB-Lızıng» AQ jumys isteıdi, dep habarlaıdy QazAqparat tilshisi.
Qazaqstan avtobıznes qaýymdastyǵynan habarlanǵandaı, búgingi kúni elimizdiń avtobýs parkiniń 65 paıyzy 7 jyldan asqan avtobýstardan turady. Al aýyl sharýashylyq tehnıkalar parkiniń tozýy kúrdeli deńgeıge jetken: traktorlar 86, kombaındar 72 paıyzǵa eskirgen. Alǵashqy eki jylda shamamen jıyny 700 avtobýs, traktor men kombaındy, al aldaǵy 5 jylda myńnan astam tehnıkany jańartý kózdelip otyr.
«QDB-Lızıng» AQ arqyly kombaındar men traktorlardy satyp alýdy qarjylandyratyn, jylyna 7 paıyzdan aspaıtyn paıyzdyq mólsherleme boıynsha avtobýstardy satyp alýdy qarjylandyrý baǵdarlamasyn júzege asyrý - úlken jeńildik. Bastapqy jarna 15 paıyz bolyp bekitilse, lızıng merzimi 7 jylǵa deıin bolmaq. Sondaı-aq, 6 aıǵa deıin jeńildik merzimi qarastyrylǵan.
«Baǵdarlama aıasynda barlyǵy 26 mlrd teńge kóleminde qarjy bólinedi. Onyn ishinde 13 mlrd teńge bıýdjet esebinen bolsa, qalǵan 50 paıyzy - kommertsııalyq qarjylandyrý. Atalǵan soma «QDB-Lızıng» AQ arqyly Qazaqstanda óndirilgen otandyq óndiristi qaıtarymdy negizde qarjylandyrýǵa múmkindik beredi. Atap aıtqanda, 6 mlrd teńge ekonomıkanyń agroónerkásip sektorynyń sýbektilerine bólinse, 20 mlrd teńge otandyq avtobýstarǵa arnalǵan», - delingen Qazaqstan avtobıznes qaýymdastyǵynyń habarlamasynda.
Qaryz alýshylarǵa «SaryarkaAvtoProm» JShS, «AgromashHoldıng KZ» AQ, «Kombaın zaýyty «Vektor» AQ, «SemAZ» JShS, Hyundai Trans Auto men Daewoo Bus Kazakhstan JShS kásiporyndary óndiretin aýyl sharýashylyq tehnıkalary men avtobýstary usynylmaq.
